روسیې د اوکراین په لوېدیځ کې هغه امریکایۍ فابریکه په نښه کړې چې د قهوې جوړولو ماشینونه او نور کورني وسایل تولیدوي. د تېرې شپې په بریدونو کې۵۷۴ ډرون څرخکې او ۴۰ توغندي کارول شوي چې لږ تر لږه ۱۹ تنه یې ټپیان کړي دي.
د موکاچېوو سیمې ښاروال اندري بالوها ویلي، دغه فابریکه په «فلیکس لېمټیډ» شرکت پورې اړه لري، چې مرکز یې په ټېکساس او ثبت شوی دفتر یې په سنګاپور کې دی. دغه شرکت زرګونه سیمه ییز کارکوونکي لري.
په لویف کې هم یو کس وژل شوی او درې نور ټپیان شوي او۲۶ کورونه زیانمن شوي.
دغه راز په دنیپروپېټروفسک سیمه کې هم د کورونو، کاروبارونو او د ګازو د نل لیکو د خرابېدو راپور ورکړل شوی.
د مسکو د دفاع وزارت ادعا کړې چې د اوکراین د انرژۍ، هوايي ډګرونو او پوځي فابریکو پر بنسټونو یې بریدونه کړي او یو بل کلي یې نیولی.
اوکراین بیا ویلي چې د روسیې د تېلو تصفیهخونه، د ډرون ګودام او د سون توکو مرکز یې په نښه کړي دي.
ټي ټي پي د پاکستان پر امنیتي ځواکونو تور لګولی، چې ددوی د جنګیالیو د مړو سپکاوی کوي او په اسانۍ یې اړوندو کورنیو ته نه سپاري. دې ډلې خپلو جنګیالیو ته سپارښتنه کړې، چې د پاکستاني سرتېرو مړي له سپکاوي پرته پخپله دفن کړي او تر امر ثاني یې ور ونه سپاري.
د بلوچستان ایالت د ژوب په سمبازه سیمه کې د پاکستاني طالبانو د ۳۳ تنو جنګیالیو له وژل کېدو او په سیمه کې د هغوی د مړو له پاتې کېدو وروسته، ټي ټي پي خپلو جنګیالیو ته امر کړی، چې د وژل کېدونکو پاکستاني سرتېرو مړي تر دویم امر پورې ونه سپاري او په خوندي ځای کې یې ښخ کړي.
د ټي ټي پي ویاند محمد خراساني د پنجشنبې په ورځ رسنیو ته په استولې خبرپاڼه کې ویلي، چې « د پاکستان امنیتي ادارې د دغې ډلې د وژل شویو جنګیالیو مړو ته سپکاوی کوي او په سړه او ګرمه هوا کې یې له ښخولو پرته تر شنه اسمان لاندې پریږدي».
دې ډلې ویلي، چې د پاکستان امنیتي ادارې د ټي ټي پي وژل شوي کسان د هغوی د کورنیو غړو او قومي مشرانو ته په اسانۍ نه سپاري.
یادې ډلې پر خپلو جنګیالو غږ کړی، چې د پاکستان د امنیتي ادارو د وژل شویو کسانو جسدونو ته له سپکاوي ډډه وکړي او په یوه خوندي ځای کې یې ښخ کړي، خو تر بلې خبرتیا دې د پاکستاني ادارو د وژل شویو کسانو جسدونه حکومت ته نه سپارل کیږي.
دغه اعلامیه داسې مهال خپریږي، چې ویل کیږي د اګست پر اتمه د بلوچستان په ژوب کې د پاکستاني طالبانو د ۳۳ وژل شویو جنګیالیو مړي تراوسه هم په سیمه کې پراته دي او ځینې هغه کسان د افغان طالبانو استخباراتو نیولي، چې ددغو مړو د انتقال لپاره یې هڅې کولې.
په نیول شویو کسانو کې یو تن د حقاني شبکې پخوانی قوماندان غلچکی تنګیوال دی، چې ویل کیږي د طالبانو استخباراتو د پکتیکا په وازه خوا ولسوالۍ کې نیولی او د څرخي پله زندان ته یې لېږدولی دی.
د سولې نوبل جایزې ګټونکې ملالې یوسفزې بنسټ «ملاله فنډ» د افغان نجونو د زدهکړې خوندیتوب، د جنسیتي توپیرونو پر وړاندې مبارزې او د جندر اپارتاید د قانوني پېژندنې لپاره د ۳،۶ میلیونه امریکايي ډالرو بودجه اعلان کړې ده.
ددغه بنسټ په وینا، دغه مرستې به د هغو افغان بنسټونو او نوښتونو ملاتړ وکړي چې د طالبانو تر واک لاندې سختو شرایطو کې د نجونو لپاره بدیلې زدهکړې برابروي، ترڅنګ یې د ښځو پر وړاندې د سیسټماټیکو محدودیتونو پر وړاندې غږ پورته کوي او د نړیوالو قوانینو له لارې د عدالت غوښتنه کوي.
ملالې فنډ ویلي، د دغو مرستو موخه دا ده چې د افغان نجونو او ښځو غږ نور هم پیاوړی شي، د دوی مشرتابه ته ملاتړ ورکړل شي او له نړۍوالې ټولنې سره د همغږۍ یو پراخ بنسټ جوړ شي.
د افغانستان لپاره ددغه فنډ د نوښت مشره سحر حلیمزۍ وایي: "موږ له هغو افغانو نجونو او ښځو سره ولاړې یو چې د خپل شتون د حذفېدو پر وړاندې درېږي، دا د خلاصون یوه مبارزه ده، او موږ به له دوی سره د مبارزې په هر پړاو کې ولاړ یو."
ددغه بنسټ د معلوماتو له مخې، د فنډ له لوري تمویلېدونکي نوي او پراخ شوي پروګرامونه شاوخوا ۱۰زره نجونو ته په افغانستان کې بدیله زدهکړه برابروي.
دا زدهکړه انلاین او حضوري ده، چې پکې نه یوازې درسي مواد، بلکې رواني مشورې، مسلکي روزنې، ډیجیټل مهارتونه او نړیوال اعتبار وړ اسناد هم شامل دي.
ملاله فنډ وایي، دا یواځې د مرستو یو پړاو دی او په راتلونکو پنځو کلونو کې به دا بنسټ د نړۍ په کچه ۵۰میلیونه ډالر د نجونو زدهکړې ته ځانګړي کړي او افغانستان یې د خپلې ستراتېژۍ مهمه برخه ګرځولې ده.
د پاکستان د بهرنیو چارو وزارت اعلان کړی، چې د چین د بهرنیو چارو وزیر وانګ يي د پنجشنبې په ورځ اسلاماباد ته رسېدلی؛ څو د پاکستان او چین د «سټراټېژیکو خبرو شپږم پړاو» ناسته کې ګډون وکړي.
پاکستان او چین له اوږدې مودې راهیسې د ستراتېژیکې ملګرتیا اړیکې لري، چې سوداګرۍ، انرژۍ، دفاع او بنسټیزو پروژو په ګډون ګڼې برخې رانغاړي. د دغه خبرو پنځم پړاو د ۲۰۲۴کال د مئ په میاشت کې په بېجینګ کې د پاکستان د بهرنیو چارو وزیر اسحاق ډار او د هغه د چینایي سیال وانګ يي په ګډه مشرۍ ترسره شوی و.
د پاکستان د بهرنیو چارو وزارت پر اېکس پاڼه لیکلي، چې وانګ يي ته د راتګ پر مهال د بهرنیو چارو وزیر اسحاق ډار هرکلی ویلی. په بیان کې ویل شوي: «هغه به مهمې لیدنې ولري، چې پهکې د پاکستان او چین د سټراټېژیکو خبرو شپږم پړاو هم شامل دی.»
تر دې سفر یوه ورځ وړاندې په کابل کې د طالبانو، پاکستان او چین د بهرنیو چارو وزیرانو درې اړخیزه غونډه هم ترسره شوه. په دغه ناسته کې د طالبانو د بهرنیو چارو وزیر امیرخان متقي، د پاکستان د بهرنیو چارو وزیر اسحاق ډار او د چین د بهرنیو چارو وزیر وانګ یي پر اقتصادي او سیاسي همکاریو خبرې کړې وې.
د پاکستان د بهرنیو چارو وزارت څرګنده کړې: «درې واړو لوریو د ترهګرۍ پر وړاندې د ګډو هڅو پر پیاوړتیا ټینګار وکړ.» همدارنګه دوی پر دې هوکړه وکړه، چې د سوداګرۍ، ټرانزیت، سیمهییزې ودې، روغتیا، ښوونې او روزنې، کلتور، د نشهیي توکو پر وړاندې مبارزې او د چین ـ پاکستان د اقتصادي دهلېز (CPEC) د غځولو په برخو کې به ګډې همکارۍ پراخوي.
د تېرې میاشتې په ترڅ کې پاکستان او چین هوکړه وکړه، چې د CPEC دویم پړاو په چوکاټ کې به په بېلابېلو برخو لکه ودانیزې انجنیرۍ، مصنوعي ځيرکتیا او کرنیزه برخه کې ګډ ښوونیز پروګرامونه پیل کړي.
د راپورونو له مخې؛ د پاکستان لومړی وزیر شهباز شریف به د روانې میاشتې په پای کې بېجنګ ته ولاړ شي؛ څو د شانګهای همکارۍ سازمان (SCO) په غونډه کې چې له اګست ۳۱مې د سپتمبر تر لومړۍ نېټې پورې کېږي؛ ګډون وکړي. تمه کېږي، چې نوموړی به د غونډې په څنډو کې د چین له ولسمشر شي جینپېنګ او د روسیې له ولسمشر ولادیمیر پوتین سره هم وګوري.
د پاکستان حکومت همدارنګه په همدې اوونۍ کې اعلان وکړ، چې د لومړي وزیر راتلونکی سفر به د چین ـ پاکستان د اقتصادي دهلېز د دویم پړاو (CPEC-II) رسمي پیل وي.
د پاکستان تحریک انصاف ګوند له لوري د پښتونخوا ملي عوامي ګوند مشر محمود خان اڅکزی د دغه هېواد په ولسي جرګه کې د شهباز شریف د حکومت لپاره د اپوزېسیون د رییس په توګه ټاکل شوی. د یاد ګوند چارواکو ویلي، چې اڅکزی د عمران خان په مستقیمه لارښوونه ټاکل شوی.
د پاکستان پخواني لومړي وزیر او اوسني زنداني سیاستوال عمران بیا د خپل ګوند یو غړی اعظم سواتی په مشرانو جرګه کې د اپوزېسیون د رییس په توګه ټاکلی دی. محمود خان اڅکزی چې د پاکستان پوځ او اوسني حکومت ضد دریځ لري دا یې لومړی ځل دی، چې د حکومت خلاف د اپوزېسیون مشري په غاړه اخلي.
همدا راز عمران خان په پنجاب کې هم د ایالتي حکومت پر وړاندې د اپوزېسیون لپاره پنځه کسان ټاکلي دي.
شنونکي باور لري، چې د اپوزېسیون د نوو مشرانو اعلان د تحریک انصاف لپاره خورا مهم دی. د هغوی په اند که دغه څوکۍ تشې پاتې شي؛ نو حکومت به د پارلمان بشپړ کنټرول په لاس کې واخلي او د اساسي قانون د مهمو څوکيو په ټاکنو کې به پراخ لاس ولري.
دغه ټاکنې داسې مهال کېږي، چې د شهباز شریف حکومت په مشرۍ یوې محکمې په پارلمان کې د عمران خان ګوند د اپوزېسیون مشرانو غړیتوب لغوه اعلان کړ. تحریک انصاف د ۲۰۲۴کال د اګست پر ۸مه اعلان کړی و، چې نوي کسان به نه معرفي کوي او دغه پرېکړه به په محکمه کې ننګوي. د ملي اسمبلۍ پخواني اپوزېسیون مشر عمر ایوب هم هغه مهال ویلي و، چې د پېښور د عالي محکمې د حکم د نقض لپاره به د ټاکنو کمېسیون پر وړاندې دعوه کوي؛ ځکه د هغه څوکۍ خالي اعلانول له قانون سره په ټکر کې کار دی.
هممهاله راپورونه ورکړل شوي، چې د پاکستان دغه پخوانی لومړی وزیر په زندان کې له یو شمېر محدودیتونو سره مخ شوی دی. ډان ورځپاڼې د خپلو سرچینو په حواله لیکلي، چې تېره اونۍ عمران خان ټلوېزیون، ورځپاڼو او ان خصوصي ډاکټر ته هم لاسرسی نه درلود.
د اسراییلي پوځ ویاند اعلان کړی، چې دوی د غزې ښار پر وړاندې د پلان شوي برید لومړیو پړاوونو ته داخل شوی او له حماس سره تر نښتو وروسته یې د دې ښار د شاوخوا سیمو کنټرول ترلاسه کړی دی.
د اسراییل د لومړي وزیر دفتر د چهارشنبه په ورځ (د زمري ۲۹مه) اعلان وکړ چې لومړي وزیر بنیامین نتانیاهو د حماس د اصلي اډو د نیولو او د دغه وسله والې ډلې د ماتولو امر کړی دی.
په ورته وخت کې د اسراییل د پوځ د ډیرو احتیاطي ځواکونو(ریزرف قوه) د بیړني غوښتنې سره سم د دفاع وزیر یسرایل کاټز د غزې ښار د نیولو عملیات تصویب کړل.
اسراییلي رسنیو راپور ورکړی، چې دا پلان د پوځ لوی درستیز «ایال زمیر» او نورو لوړپوړو قوماندانانو له خوا «کاتز »ته وړاندې شوی و او هغه منلی دی.
یاد عملیات د «ګیدعون–ب ارابه» په نوم پيل شوي، چې دغه د پخواني عملیاتو دوام دی.
د اسراییل پوځ په وینا، دوی د غزې ۷۵ سلنه خاوره نیولې وه او هڅه یې کوله چې حماس د بندیانو د تبادلې هوکړې ته اړ باسي.
د دې راپور له مخي، د اسراییل دفاع وزیر همداراز له هغو «بشري چمتووالی» سره موافقه کړې، چې شاوخوا یو میلیون فلسطیني ملکي وګړي له غزې ښاره د دې سیمې جنوب ته ولېږدوي.
کاتز، تایید کړې چې د دې عملیاتو په ترڅ کې اسراییل پوځ به د ۶۰ زره احتیاطي سرتېرو د رابللو امر صادر کړي.