د طالبانو د بهرنیو چارو وزارت درېیم سیاسي مرستیال عبدالحی قانت وایي، د دغې ډلې بهرنی سیاست اوسمهال د عکسالعمل پر ځای په سیمه او نړۍ کې د دوی د ګټو پر بنسټ ولاړ دی. هغه زیاتوي چې د سیاست اصول یې «افغانیت او اسلامیت» دی.
نوموړي په کابل کې د چین، پاکستان او د طالبانو ترمنځ ګډې ناستې ته په اشارې سره زیاته کړې چې په بهرني سیاست کې د دوی کوربهتوب او فعالې ډېپلوماټیکې هڅې د همدې سټراټېژیک بهیر یوه برخه ده.
قانت لیکي: «ښايي تېرو څو لسیزو کې دا لومړی ځل وي چې افغان حکومت [طالبان] داسې مستقل سیاست تجربه کوي». هفه ټینګار کوي چې د یو داسې وضعیت جدياړتیا وه، څو خپل سیاست په خپلو ارزښتونو او لومړیتوبونو باندې وڅرخوي.
نوموړی داسې مهال دا ادعا کوي چې همدې کابل کې د پاکستان او چین د بهرنیو چارو وزیران په افغانستان کې د ترهګرو له پناه ځایونو طالبانو ته شکایتونه وکړل. اسلاماباد د ټيټيپي مسالې په تړاو له طالبانو اقدامات غوښتي او بیجېنګ بیا د ختیځ ترکستان د اسلامي غورځنګ په تړاو خپلې اندېښنې شریکې کړي دي.
د چارو کارپوهان باور لري چې د دغو دواړو ګاونډیانو په ګډون د منځنۍ اسیا هېوادونو له لوري هم د طالبانو سره روان تعامل د امنیتي اندېښنو یا مجبوریتونو د حل یو برخه ده. د ملګرو ملتونو په ګډون یو شمېر هېوادونه ښکاره اندېښنې لري چې پر کابل واکمنې ډلې د القاعده په ګډون یو شمېر نورو ترهګرو ډلو ته پناه ځایونه ورکړي دي.
طالبانو ته خپل ګاونډيان او منځنۍ اسیا ورپاتې ده او هغوی هم ورسره ګنې لانجې کونجې لري. دا ډله په نړۍواله کچې له سختې سیاسي، اقتصادي او هویتي انزوا سره مخ ده او پر مشرانو یې ګڼ بندیزونه هم لګول شوي دي. همدا راز د بشري حقونو سازمانونو هم اندېښنه ښوولې چې دې ډلې په افغانستان کې د خلکو ژوند تریخ کړی او د بشري حقونو وضعیت یې هم تر بل هر وخته ډېر خراب کړی دی.
