د افغانستان د ۱۰۶مې سیاسي خپلواکۍ په پار اسټرالیا کې پر افغان سفارت درې رنګه ملي بیرغ پورته شو. په جوړو شویو مراسمو کې د افغانستان د پرځېدلي جمهوري نظام سفیر، افغان مېرمنو، ځوانانو او یو شمېر اسټرلیايي ډېپلوماتانو ګډون کړی.
په کنبرا کې د افغانستان سفارت د دغو مراسمو لنډه ویډیو نن (یکشنبه، وږي ۲مه) پر خپله فېسبوکپاڼه خپره کړې ده.
شپږ ورځې وړاندې په اسټرالیا کې د افغانستان سفارت له لوري په خپرې شوې اعلامیه کې ویل شو و چې د افغانستان د خپلواکۍ د ۱۰۶مې کلیزې په مناسبت د بیرغ ځړولو مراسم د اګسټ پر ۲۴مه ترسره کوي.
د یادونې ده چې د افغانستان د خپلواکۍ ۱۰۶مه کلیزه په افغانستان کې دننه او بهر د ګڼو افغانانو، ټولنیزو ټولنو او ځینو سفارتونو له لوري ونمانځل شوه.
