د افغانستان د کرېکټ ملي لوبډلې غړو راشد خان او محمد نبي د کونړ او ننګرهار وروستۍ زلزلې له قربانیانو سره د مرستې لپاره د خیریه کمپاینونو د پیل اعلان کړی دی او له خلکو یې د بېړنۍ مرستې غوښتنه کړې ده.
راشد خان په ایکس لیکلي: «د کونړ د خلکو له ناورین وروسته زړه ماتی شوی یم، ما د قربانیانو د ملاتړ لپاره د مرستو کمپاین پیل کړی، هره مرسته کولی شي د ژوندو په بېرته رغولو کې مرسته وکړي، مهرباني وکړئ زموږ ترڅنګ ودرېږئ.»
همدارنګه، محمد نبي هم په خپل پوسټ کې د افغانانو او د نړیوالو د مرستو غوښتنه کړې ده.
نوموړي لیکلي: «یوې قوي زلزلې په کونړ او ننګرهار کې له ۱۴۰۰ څخه ډېر کسان مړه او ګڼې کورنۍ بېکوره کړې دي، زموږ خلک بېړنۍ مرستې ته اړتیا لري، هره مرسته مهمه ده.»
دوی دواړو د خپلو کمپاینونو لینکونه له خپلو مینهوالو سره شریک کړي او ټینګار یې کړی چې د زلزلهځپلو کورنیو ملاتړ د هر افغان او انسان ګډ مسوولیت دی.
