د ناروې د بشري مرستو مشر اریک ابیلډ وایي، چې ناروې د خپلو شریکانو او خیریه بنسټونو له لارې له افغانانو سره ۵۸ مېلیونه ډالره مرسته کړې او د نورو مرستو لپاره هم خپلو هڅو ته دوام ورکوي.
نوموړي دغه څرګندونې تېره ورځ د طالبانو د کډوالو او بېرته راستنيدنکو چارو وزارت له مالي او اداري مرستیال سره په لیدنه کې کړې دي.
د طالبانو د کډوالو او بېرته راستنيدنکو چارو وزارت په خپره شوې خبرپاڼه کې راغلي، چې په دغه لیدنه کې له ایرانه د افغان کډوالو د جبري اېستلو په اړه هم خبرې شوې دي.
د دغه وزارت مالي او اداري مرستیال کلیم الرحمن فاني ویلي: «افغانانو په خپل مټ په ایران کې ژوند جوړ کړی و؛ خو موږ ډېر خواشیني یو، چې ایران ناڅاپه د هغوی د شړلو پرېکړه وکړه او په نږدې شپږو میاشتو کې یې څه باندې ۱۶ لکه افغانان په زروه راوشړل.»