د امریکا د ټرانسپورټ وزارت چارواکو ویلي، د هوايي ټرافیک هغه کارکوونکي به له دندو ګوښه کړي چې د حکومتي ادارو بندېدو پرمهال کار ته نه حاضرېږي. په امریکا کې له څو ورځو راهیسې د هوايي ټرافیک کنټرول په برخه کې د کارکوونکو د کمښت له امله نږدې ۲۱زره الوتنې ځنډېدلې دي.
له هغه وروسته چې د ګانګرس غړي د بودجې په سر هوکړې ته ونه رسېدل؛ د امریکا د فدرال حکومت ډېرې ادارې وتړل شوې او له دې لړۍ نهه ورځې تېرېږي.
د لومړي وزیر نتنیاهو دفتر اعلان کړی، چې د اسراییل حکومت د غزې لپاره د ټرمپ پلان تصویب کړی دی. د ډونالډ ټرمپ زوم او استازی جیرډ کوشنر او سټیو ویټکاف هم په دې غونډه کې حاضر وو.
د اسراییل رسنیو له خوا خپاره شوي د مصر په شرمالشیخ کې د غزې د سولې لپاره د لاسلیک شوي تړون انځور ښيي چې: ۷۲ساعته اوربند پلان شوی دی.
په دې موده کې به د اسراییل هوايي او توپچي بریدونه او د بېپیلوټه الوتکو د استخباراتي الوتنو فعالیتونه په هغو سیمو کې چې خالي شوي ودرول شي.
د تړون له مخې ټول ژوندي اسراییلي یرغمل شوي کسان او د مړو جسدونه به د اسراییلي پوځ له وتلو وروسته په ۷۲ ساعتونو کې وسپارل شي.
په بدل کې اسراییل به په ورته وخت کې فلسطیني بندیان خوشې کړي.
د تړون له مخې د بشري مرستو بشپړ استول به وروسته له لاسلیک سمدلاسه پیل شي.
د اسرایيلي رسنیو په وینا، د اسراییل د کابینې په ناسته کې د کورني امنیت وزیر د ټرمپ له استازو سره د سولې تړون د موادو په اړه، په ځانګړي ډول د فلسطیني بندیانو خوشې کولو اړوند بحث کړی دی.
هندي رسنيو راپور ورکړی چې هند ته د طالبانو د بهرنيو چارو وزير اميرخان متقي سفر د دواړو هېوادونو ترمنځ د دوهاړخيزو همکاریو پياوړتيا او له پاکستان سره د امنيتي اندېښنو پر موضوع متمرکز دی. ټاکل شوې چې متقي به د جمعې په ورځ د هند د بهرنيو چارو له وزير «جېشنکر»سره وګوري.
د هندي رسنيو د پنجشنبې په ورځ په خپلو راپورونو کې لیکلي چې نوی ډیلی غواړي له طالبانو سره د سوداګرۍ، بشرپاله مرستو، روغتيا او سيمهييز امنيت په برخو کې تعامل پراخ کړي.
د راپورونو له مخې، اميرخان متقي به په دې سفر کې د هند د ملي امنيت له سلاکار سره هم وګوري، او د دې کتنې يو مهم بحث به د طالبانو ژمنې وي چې له افغانستان څخه د ترهګرۍ د ګواښ مخه ونیسي.
متقي نن پنجشنبه هند ته ورسېد، د هغه د سفر موخه د « نوي ډیلي سره د اقتصادي اړیکو پياوړتیا» بلل شوې ده. دا د طالبانو له بيا واکمنېدو وروسته (د ۲۰۲۱کال د اګست له مياشتې راپدېخوا) هند ته د اميرخان متقي لومړنی رسمي سفر دی.
د ټايمز اف انډيا ورځپاڼې په ليکنه راغلي، دا سفر د طالبانو هڅې ښيي چې غواړي له سيمهييزو قدرتونو سره تعامل زيات کړي څو د خپل حکومت د رسميت پېژندلو لپاره زمينه برابره کړي.
د هند د بهرنيو چارو وزارت وياند«رندیر جیسوال»پر اېکس خواله رسنۍليکلي:«موږ د ښاغلي متقي سره د دوهاړخيزو اړیکو او سيمهييزو مسايلو په اړه معنا لرونکو خبرو اترو ته ليوالتيا لرو».
بلخوا انډيا اېکسپرس ورځپاڼې راپور ورکړی چې د هند د بهرنيو چارو وزارت لا هم په دې بحث کوي چې ايا د متقي او جېشنکر د رسمي کتنې پر مهال به د طالبانو بيرغ د هند تر څنګ ځای پر ځای شي که نه.
هند، سره له دې چې په نوي ډیلي کې یې د افغانستان سفارت د طالبانو استازو ته سپارلی، خو تر اوسه يې اجازه نه ده ورکړې چې د افغانستان پر رسمي سفارت د طالبانو بيرغ ورپوي.
دغه سفر په داسې حال کې ترسره کېږي چې د طالبانو او د پاکستان ترمنځ اړيکې له اوږدې مودې راهيسې ترینګلې دي، او هند غواړي له دې وضعیت څخه په سيمهييزه کچه د خپلو سياسي او امنيتي موخو لپاره ګټه واخلي.
اسراییل او د فلسطین وسله والې ډلې د اوربند او بندیانو د تبادلې تړون لاسلیک کړ. د اسراییل یوې حکومتې ویاندې ویلي، چې اوربند د کابینې له غونډې ۲۴ ساعته وروسته عملي کیږي او مخالفه ډله به یرغمل شوي اسراییلیان په ۷۲ ساعتونو کې خوشې کړي. د ملګرو ملتونو سرمنشي د اوربند هرکلی کړی.
د رویټرز اژانس د راپور له مخې، د دواړو لوریو چارواکو تایید کړه چې تړون د مصر د شرم الشیخ په سمندري ښار کې له غیر مستقیمو خبرو وروسته لاسلیک شوی.
د یاد تړون له مخې به د اسراییل او حماس ترمنځ جګړه ودریږي.
د تړون له مخې به اسراییل له غزې څخه د خپلو ځواکونو د اېستلو بهیر پیل کړي او حماس به هغه یرغمل شوي اسراییلیان خوشې کړي چې د جګړې پرمهال یې نیولي وو.
همدارنګه د یاد تړون له مخې به اسراییل هم نیول شوي فلسطینیان له خپل زندانونو خوشې کړي.
د اسراییل د لومړي وزیر دفتر ویلي، چې بشپړ اوربند به د حکومت له خوا تر تصویب کېدو وروسته عملي شي.
تمه ده چې اسراییل نن د اوربند تړون د تصویب لپاره د کابینې غونډه وکړي.
د اسراییل یو حکومتي ویاندې ویلي، چې اوربند به د کابینې له غونډې ۲۴ ساعته وروسته عملي شي او وروسته به په ۷۲ ساعتونو کې حماس ټول یرغمل شوي اسراییل خوشې کړي.
فلسطیني ساینسپوه ډاکټر عمر یاغي د کیمیا په برخه کې د ۲۰۲۵ کال د نوبل جایزه وګټله. د نوبل جایزې کمیټې د اکتوبر پر ۸مه اعلان وکړ چې عمر یاغي له خپلو دوو نورو همکارانو جاپاني سوسومو کیتاګاوا او استرالیايي ریچارد رابسن سره په ګډه په کیمیا کې د نوبل جایزه ګټلې ده.
عمر یاغي په عمان کې د فلسطیني کډوالو په پنډغالي کې زیږیدلی او اوس د کالفورنیا په یوه پوهنتون کې استاد دی.
نوموړي د جایزې تر اعلان وروسته وویل:«زه په یوه ډېره بېوزله کورنۍ کې زیږیدلی یم، موږ په یوه واړه کور کې اوسیدو، زما مور او پلار په زحمت لیکل او لوستل کولای شول. دا یو اوږد سفر و.»
د نوبل جایزې کمیټې ویلي، چې درېواړو ساینسپوهانو د فلزي عضوي چوکاټونو او کووالنټ عضوي چوکاټونو د جوړښت او پرمختګ له لارې د کیمیا په علمي او صنعتي برخو کې بنسټیز بدلونونه رامنځته کړي دي.
د عمر یاغي څېړنو له هوا څخه د اوبو راټولولو، د کاربن ډای اکسایډ جذبولو او د انرژۍ ذخیره کولو په برخه کې د چاپېریال د ستونزو د حل لپاره نوې دروازې پرانیستې دي.
عمر یاغي ته به د نوبل جایزه د روان کال د ډسمبر پر ۱۰مه په رسمي مراسمو کې د سویډن په پلازمېنه سټاکهولم کې ورکړل شي.
بریتانیا اعلان کړی چې لندن او نوي ډیلي د ۴۶۸ میلیونه ډالرو په ارزښت یو تړون لاسلیک کړی، چې له مخې به یې هند ته د بریتانیا جوړ سپک څو موخیز توغندي ورکول کیږي.
دا تړون د برېتانیا لومړي وزیر کییر سټارمر د هند د سفر پر مهال په ممبی کې لاسلیک کړی، او موخه یې د دواړو هېوادونو د دفاعي اړیکو پیاوړتیا ښودل شوې.
لندن ویلي، دا توغندي د شمالي ایرلنډ د «تالیس» شرکت لهخوا جوړېږي، چې د اوکراین لپاره هم ورته وسلې تولیدوي.
حکومت وايي، دا تړون به د یادې فابریکې شاوخوا ۷۰۰ کاري فرصتونه خوندي کړي.
بریتانیا همدارنګه ویلي، له هند سره یې د سمندري بېړیو لپاره د برېښنايي ماشینونو د ګډې پروژې نوی پړاو هم پیل کړی، چې ارزښت یې ۲۵۰ میلیونه پونډه دی.