د افغانستان د کرېکټ ملي لوبغاړي ګلبدین نایب د پکتیکا په ارګون ولسوالۍ کې د پاکستان خونړي برید په غبرګون کې پاکستان ته د «بزدلانه پوځي رژیم» خطاب کړی او زیاته کړې یې ده، چې د دوی دغه ډول «وحشیانه» کړنې هېڅکله هم د افغان ملت اراده نشي کمزورې کولی.
ګلبدین نایب په ارګون ولسوالۍ کې د پاکستان له لوري د خونړي برید په غبرګون کې ویلي، «دا برید نه یوازې د انسانیت او اسلامي اصولو ښکاره سرغړونه ده، بلکې د افغانستان د خپلواکۍ، عزت او ملي غرور پر وړاندې یو ښکاره تجاوز هم دی.»
د نوموړي په وینا، د پاکستان د پوځ دغه ډول «وحشیانه» کړنې هېڅکله د افغان ملت اراده نهشي کمزورې کولی، بلکې د افغان زړورو زلمیانو د وطنپالنې روحیه لا پیاوړې کوي.
د یادونې وړ ده، چې پر اُرګون ولسوالۍ د پاکستان په هوايي بریدونو کې د کرېکټ ۳ سیمه ییز لوبغاړي هم وژل شوي دي.
