د بشري حقونو نړیوال بنسټ: پر افغان کرېکټ لوبغاړو د پاکستان برید د بشري‌ حقونو سرغړونه ده

ګلبدین نایب په ارګون ولسوالۍ کې د پاکستان له لوري د خونړي برید په غبرګون کې ویلي، «دا برید نه یوازې د انسانیت او اسلامي اصولو ښکاره سرغړونه ده، بلکې د افغانستان د خپلواکۍ، عزت او ملي غرور پر وړاندې یو ښکاره تجاوز هم دی.»

د نوموړي په وینا، د پاکستان د پوځ دغه ډول «وحشیانه» کړنې هېڅکله د افغان ملت اراده نه‌شي کمزورې کولی، بلکې د افغان زړورو زلمیانو د وطن‌پالنې روحیه لا پیاوړې کوي.

د یادونې وړ ده، چې پر اُرګون ولسوالۍ د پاکستان په هوايي بریدونو کې د کرېکټ ۳ سیمه ییز لوبغاړي هم وژل شوي دي.

حلیم فدايي د جمعه په ورځ پر خپله اېکس پاڼه لیکلي، چې د پاکستان د بریدونو لامل «د پاکستان د نیابتي ډلې حاکمیت دی»

نوموړي لیکلي: «تر اوربند وروسته د پاکستان ظالم او جابر رژيم پر پکتیکا برید کړی او د محلي کرېکټ لوبغاړې یې شهیدان کړي‌ دي.»

د فدايي په خبره پر افغانستان د پاکستان برید نوی نه دی: «پرون یې غیر مستقیم او نن مستقیما تجاوز کوي. د پاکستان تېری او اشغال تر لمر روښانه دی. اما دا په دې مانا نه ده چې په دې بهانه «طالب شویي» وشي.»

فدايي ټینګار کړی، چې تر هغو باید د طالب او پاکستان دوښمني ونه منل شي تر څو چې یې ولسواک نظام نه وي منلی.

هغه لیکلي: «تر هغې د طالب او پاکستان دوښمني ونه منئ، ترڅو یې چې فورا ولسپال او ولسواک نظام نه وي منلي، تر هغې یې چې د نجونو پرمخ ښوونځي نه وي خلاص کړي. ترڅو یې د ولس سیاسي او مدني حقونه نه وي ورکړي.»

فدايي زياتوي، چې دوی نن افغانستان په نړېوال سټیج منزوي، فقیر او محتاج کړی دی.

شاه محمود میاخېل د جمعه په ورځ پر افغانستان د پاکستان بریدونو ته په اشاره لیکلي: «که راپورونه دقیق وي، نو پاکستان په قصدي ډول ملکي وګړي په نښه کړي ترڅو د ډیورنډ کرښې په اوږدو کې تاوتریخوالی زیات کړي.»

نوموړی دا ډول کړنې د نړیوالو قوانینو او بشري اصولو سرغړونه یادوي.

د میاخېل په خبره دا ډول ستراتيژي په سیمه کې ګډوډي زياتوي او د پاکستان اوږدمهاله امنیت او سوکالي هم له ګواښ سره مخ کوي.

محمد نبي په همدې تړاو په یوه پیغام کې د پاکستان په هوايي بریدونو کې د کرېکټ سیمه ییزو لوبغاړو د وژنې خبر خورا دردوونکی بللی او په وینا یې «دا پېښه یوازې د پکتیکا نه، بلکې د ټول افغانستان د کرېکټ کورنۍ او ملت لپاره ستر غم دی.»

هغه د یادو لوبغاړو کورنیو ته د تسلیت په ویلو سره زیاته کړې، «موږ به د دوی یاد او قرباني هېڅکله هېر نه کړو.»

د یادونې وړ ده، چې د پکتیکا پر اُرګون ولسوالۍ د پاکستان د نن شپې په هوايي بریدونو کې د کبیر، صبغت‌الله او هارون په نومونو ۳ لوبغاړي او ۵ ولسي وګړي وژل شوي او یو شمېر نور ځايي اوسېدونکي ټپيان شوي دي.

مریم سلېمانخېل د جمعه په ورځ پر خپله اېکس پاڼه لیکلي: «پاکستان په عین وخت کې په پکتیکا، پکتیا او سپین‌بولدک بمبارۍ کوي، چې د افغان ملکي وګړو ان ځوان کرکټ لوبغاړي چې د لوبې وروسته کور ته روان وو ژوند اخلي.»

هغې دغو بریدونو ته په اشاره پاکستان ته لیکلي: «دا ښکاره تېری او دولتي تروریزم دی. بس دی، نوره چوپتیا بس ده.»

نوموړې پر پاکستان د پراخو بندیزونو غوښتنه کړې.