د افغان کرېکټ د یو ورځنیو سیالیو لوبډلمشر حشمتالله شهیدي د پکتیکا پر ارګون ولسوالۍ برید چې له امله یې د کرېکټ ۳ سیمه ییز لوبغاړي او یو شمېر ولسي وګړي وژل شوي، د «پاکستان رژيم ظالمانه» برید بللی دی.
حشمتالله شهیدي په خپله فېسبوک پاڼه ویلي، دغه برید یوازې د کرېکټ د سیمه ییزو لوبغاړو د کورنیو لپاره نه، بلکې د ټول ملت او د سپورټ د کورنۍ لپاره د غم ورځ ده.
هغه زیاتوي، «دوی د سولې، ویاړ او وطن د رڼا استازي وو، د توپ او بېټ له لارې یې د وطن نوم روښانه ساته، خو د جبر تیارو پرې د تل لپاره تور سیوری واچاوه.»
هغه په یاده پېښه کې د وژل شویو له کورنیو سره ژوره خواخوږي هم څرګنده کړې ده.
د پکتیکا په اُرګون ولسوالۍ کې د پاکستان په نن شپني هوايي بریدونو کې د کرېکټ له سیمه ییزو ۳ لوبغاړو سربېره یو شمېر ولسي وګړي وژل شوي دي.
