زېلېنسکي له اروپایي مشرانو د اوږده واټن ویشتونکو وسلو غوښتنه وکړه
د اوکراین ولسمشر ولادیمیر زېلېنسکي د اروپایي ټولنې له مشرانو غوښتي چې اوکراین ته اوږده واټن ویشتونکي وسلې ورکړي، څو وکولای شي د روسیې پر وړاندې د جګړې بڼه بدله کړي.
د اوکراین ولسمشر ولادیمیر زېلېنسکي د اروپایي ټولنې له مشرانو غوښتي چې اوکراین ته اوږده واټن ویشتونکي وسلې ورکړي، څو وکولای شي د روسیې پر وړاندې د جګړې بڼه بدله کړي.
زېلنسکي دا غوښتنه د بروکسل په غونډه کې وروسته له هغې وکړه چې د امریکا له ولسمشر ډونالډ ټرمپ څخه د "توم هاوک" ډول توغندیو د ترلاسه کولو ژمنه یې ترلاسه نه کړه.
هغه وویل: «کله چې موږ د اوږده واټن وسلو خبره کوو، مطلب مو دا دی چې د پوتین رژیم باید د دې جګړې ریښتینې پایلې احساس کړي، زه له تاسو غواړم د هر هغه څه ملاتړ وکړئ چې اوکراین ته دا وړتیا ورکوي، ځکه دا کار د روسیې لپاره ډېر مهم دی.»
زېلېنسکي زیاته کړه، د روسیې ولسمشر ولادیمیر پوتین هغه وخت ډېر اندېښمن شو، کله چې د اوږده واټن وسلو موضوع راپورته شوه، ځکه چې دا وسلې د جګړې لوری بدلولی شي.
هغه وویل، امریکا یوازینی هېواد نه دی چې دا ډول وسلې لري، بلکې ځینې اروپایي هېوادونه هم «توم هاوک» توغندي لري او اوکراین له هغوی سره خبرې کوي څو مرسته ترې ترلاسه کړي.
ټرمپ زیاته کړې ده، «زه تل داسې احساس کوم چې هغه (پوتین) غوښتل ټول اوکراین ونیسي، نه یوازې یوه برخه. کله چې زه د خپلې لومړۍ دورې لپاره ولسمشر وم، موږ نسبي اړیکې لرلې، که څه هم د [روسیه، روسیه،روسیه]د دروغجنې قضیې له امله دا کار ستونزمن و. ما له ولسمشر پوتین سره د اوکراین په اړه خبرې کړې وې، هغه به تل دا هېواد د خپلو سترګو تور باله.»
هغه ویلي: « دا کار به هېڅکله نه وای شوی. ځکه هغه پوهېده چې پایلې به یې ډېرې سختې وي. خو کله چې په هېواد کې له درغلیو ډکې ټاکنې وشوې او زه نور په واک کې نه وم، پوتین فکر وکړ [هو، اوس یې وخت دی] بله دا چې هغه د افغانستان وضعیت ته وکتل، چې څومره بد اداره شو، او دې خبرې پوتین ته یو بله قوي انګېزه ورکړه، ترڅو پر اوکراین برید وکړي».
ټرمپ ټینګار وکړ، چې که څه هم پوتین له پخوا د اوکراین د بشپړ نیولو اراده لرله، خو اوس ښایي د خبرو اترو او احتمالي جوړجاړي لپاره چمتو وي.
هغه وویل:«زه فکر کوم اوس هغه لږ څه د مذاکرې لپاره تیار دی، او فکر کوم هغه د یوې معاملې جوړولو ته چمتو دی. خو موږ نه غواړو چې هغه ټول اوکراین ترلاسه کړي.»
