د طالبانو د هرات د اطلاعاتو او کلتور ریاست وايي چې د سلما بند د اوبو خوشې کېدو بهیر به د لړم مياشتې له لسمې نېټې پیل او د شلو شپو او ورځو لپاره به دوام ولري. دا پرېکړه د طالبانو د هرات والي اسلامجار په مشرۍ او د اړوندو ادارو له استازو سره په ناسته کې شوې ده.
له دې وړاندې د تلي په ۲۴مه د طالبانو د هرات ولایت چارواکو اعلان کړی و، چې د سلما بند د اوبو د خوشې کولو پروګرام به د روان کال د لړم په ۱۰مه نېټه پیل شي او د شلو شپو او ورځو لپاره به دوام کوي.
د طالبانو تر واک لاندې د هرات د صنايعو خونې مسوولین وايي، اوسمهال د هرات ۱۰۰ صنعتي شرکتونه خپل محصولات نړېوالو بازارونو ته صادروي. دوی زیاتوي په دې صادراتي توکو کې المونیمي لوښي، بېلابېل مشروبات، غذایي توکي او ترشيجات شامل دي.
یاد مسوولین زیاتوي چې دغه توکي اروپايي هېوادونو سربېره امریکايي او اسیایي هېوادونو ته صادریږي.
د طالبانو د هرات والي دفتر د شنبې په ورځ (د لړم ۱۰مه) ددې ولایت د صنايعو خونې مسوولینو په حواله ویلي، چې د کورنيو محصولاتو کيفيت او بستهبندي په وروستيو کلونو کې ښه شوې او دا مهال شاوخوا ۳۵۰ ډوله صادراتي توکي د هرات په فابريکو کې توليديږي.
دوی زیاتوي چې اوس مهال له ۱۱۷۰ څخه ډېر شرکتونه د دې ولايت په صنعتي ښارګوټي کې فعاليت لري او شاوخوا ۱۵۰ زره کارګران په دغو شرکتونو کې په کار بوخت دي.
دا ادعا په داسې حال کې کېږي، چې له دې وړاندې د کندهار صنعت کارانو افغانستان انټرنشنل ته ویلی و، چې په تېرو څلورو کلونو کې د یاد ولایت په صنعتي پارک کې له ۳۵۵ فعالو تولیدي فابریکو نه اوس یوازې ۱۳۰ فعالې دي او پاتې نورې بندې شوې دي.
صنعت کارانو د فابریکو بندیدو لامل د برېښنا نشتوالی او ددوی ستونزو ته د طالبانو نه رسیده ګي یاده کړې وه.
د کندهار د صنایعو او کانونو خونې سرچینو د چارشنبې په ورځ، د لړم پر اوومه، افغانستان انټرنشنل ـ پښتو ته وویل، چې د تېر جمهوري نظام له پرځېدو وروسته په یاد ولایت کې ۲۲۵ لویې او وړې تولیدي فابریکي بندې شوي دي.
په ننګرهار کې د طالبانو روغتیایي چارواکي وايي، چې په دغه ولایت کې د شري واکسین لس ورځنی کمپاین پیل شوی دی. تمه کیږي چې د کمپاین په پایله کې شاوخوا ۳۵۰ زره ماشومان چې عمرونه یې له شپږو میاشتو څخه تر لسو کلونو پورې دي د شري واکسین ترلاسه کړي.
د طالبانو د ننګرهار والي رسنیز دفتر وايي چې نن شنبه (د لړم ۱۰مه) په ننګرهار کې د یونېسف د سیمهییزو چارواکو په شتون کې د شري ناروغۍ پر وړاندې د واکسین کمپاین پیل شو.
په ننګرهار کې د طالبانو مرستیال والي عزیزالله مصطفی ویلي، چې افغان وګړي د اقتصادي ستونزو له امله د مختلفو ناروغیو له خپریدو سره مخ دي.
هغه د ننګرهار له اوسیدونکو وغوښتل، چې د کمپاین د پلي کولو لپاره د واکسین ټیمونو سره همکاري وکړي.
د روغتیا نړیوال سازمان او د ملګرو ملتونو د ماشومانو وجهي صندوق د تلي ۱۷مه په افغانستان کې د شري واکسین د لومړي پړاو پای اعلان کړ.
یادو سازمانونو اعلان وکړ، چې د کمپاین په لومړي پړاو کې د شپږو میاشتو څخه تر لسو کلونو پورې ۸،۹ میلیونه ماشومانو واکسین ترلاسه کړ.
د شري ناروغۍ د واکسین لومړی پړاو د هېواد په ۱۷ سړو ولایتونو کې ترسره شو.
د ملګرو ملتونو د ماشومانو وجهي صندوق او د روغتیا نړیوال سازمان مخکې یادونه کړې وه، چې په ۲۰۲۴ کال کې په ټول افغانستان کې د شري ناروغۍ لږ تر لږه ۹ زره ۳۰۰ پیښې ثبت شوي دي.
سږ کال،د اګست تر میاشتې پورې په هېواد کې د دې ناروغۍ شاوخوا ۸ زره ۵۰۰ پیښې ثبت شوي دي.
د پاکستان د دفاع وزیر خواجه اصف په خپلو تازه څرګندونو کې ویلي، د تورخم دروازه یوازې غیرقانوني افغان کډوالو د ستنولو لپاره پرانېستل شوې ده او له طالبانو سره د مذاکراتو تر بشپړیدو به له افغانستان سره هر ډول سوداګري او راکړه ورکړه بنده وي.
خواجه اصف د پاکستان جیونیوز سره په مرکه کې ویلي، تر څو چې له طالبانو سره مذاکرات بشپړ شوې نه وي، له افغانستان سره به سوداګري او هر ډول راکړه ورکړه بنده وي.
خواجه اصف زیاته کړې، چې د تورخم دروازه د غیر قانوني افغانانو د ستنولو لپاره پرانېستل شوې او د کډوالو د ستنولو لړۍ به دوام لري.
خواجه اصف وویل:« د اوس لپاره د ویزو د پروسس په ګډون هر څه ځنډول شوي دي او دا پروسه به تر هغه وخته دوام ولري، تر څو مذاکرات بشپړ شوي ونه اوسي.»
خواجه اصف ویلي،په دې وروستیو کې خیبر پښتونخوا د ناامنیو له امله سخت ځل شوی او د پاکستان ټول سیاسي ګوندونه، ادارې او عام خلک ژر تر ژره د ستونزې د حل غوښتنه کوي او دا حل یوازې د افغانستان له خاورې څخه د ترهګرۍ په مخنیوي کې دی.
نوموړي دا څرګندونې پر داسې مهال کړي، چې د طالبانو او پاکستان ترمنځ په استابول کې پر اوربند هوکړه شوې او د مذاکراتو درېیم پړاو به د روانې میاشتې په شپږمه نېټه پیل شي.
د فرانسې رسنیو راپور ورکړی چې په پاریس کې د ترهګرۍ ضد ملي څارنوالۍ دفتر یو ۲۰ کلن افغان ځوان له داعش خراسان سره د همکارۍ او اړیکو په تور نیولی دی. د راپور له مخې، دا سړی داعش خراسان ته د پیسو لیږلو او د هغوی د تبلیغاتو په خپرولو تورن دی.
د فرانس پرېس خبري اژانس نن شنبه (د لړم ۱۰مه) د ملي ترهګرۍ ضد څارنوالۍ دفتر په حواله راپور ورکړ، چې دا ځوان «جنايي ترهګریز سازمان سره د همکارۍ او د ترهګریز عمل تمویل» په تور نیول شوی دی.
راپور زیاته کړې چې دغه ځوان په څرګنده توګه د جهادي ایډیالوژۍ ملاتړ کړی.
هغه د داعش خراسان سره د اړیکو په درلودلو او په ځانګړې توګه د دې ترهګریز سازمان لپاره د پېسو لیږلو او په تبلیغاتو تورن دی.
ددې ځوان د هویت په اړه تر اوسه نور معلومات نه دي خپاره شوي.
دغه کس د اکتوبر په ۲۶مه نېټه په لیون ښار کې نیول شوی و.
د لو پاریزین ورځپاڼې راپور ورکړی، چې دا سړی څو کاله دمخه فرانسې ته داخل شوی و. هغه د فرانسې د داخلي امنیت عمومي ریاست د افسرانو لخوا په لیون کې د کډوالو په یوه پناه ځای کې ونیول شو.
د ایران د تایباد ولسوال حسین جمشیدي ویلي، چې د روان کال له پیله یې له افغانستان سره د دوغارون پر پوله د ۱۷۴۶ میلیارده ریالو په ارښت قاچاقي توکي نیولي دي. د هغه په وینا، په نیول شویو قضیو کې ۸۰ سلنه افغان اتباع ښکېل دي.
دغه ایراني چارواکي ویلي، د ایران د قاچاقي توکو پر ضد ادارې په تایباد کې د قاچاقي توکو په اړه ۱۰۴۴ قضیې ثبت کړې دي.
د حسین جمشیدي په خبره په کشف شویو قاچاقي توکو کې تېل، غلا شوي ګرځنډه تلیفونونه، ګاز لرونکي څښاک او د موټرو پرې شاملې دي، چې ایران ته د داخلېدو او یا هم له ایران څخه د وتلو پرمهال نیول شوي دي.
د خراسان رضوي د تایباد ولسوالی ویلي:«د دوغارون د قاچاقو پر ضد ادارې د خراسان رضوي په کچه د دغو چارو په رسېدو کې تر ټولو لوړ ځای لري او شاوخوا ۸۰ سلنه قضې چې پر دغه پوله ثبت شوي دي د افغان وګړو سره تړاو لري.»
جمشیدي زیاته کړې، چې له رسمي لارو پرته ایران ته د توکو د ننوتلو او اېستلو هر ډول اقدام جرم ګڼل کېږي او له سرغړونکو سره به د قانون له مخې چلند وشي.
پر همدغه مهال د تایباد ولسوال ویلي، چې د دوغارون بندر له لارې هره ورځ له ۴۰ زرو څخه ډېر ایراني او افغان موټر چلونکي او سوداګر تګ راتګ کوي او دغې ګڼې ګوڼې د قاچاق د څار اړتیا ډېره کړې ده.