طالبانو د ننګرهار په لعلپورې ولسوالۍ کې «له کور څخه د تېښتې، شراب خرڅولو، لواطت او غلا» په تور د يوې ښځې په ګډون ۱۴ کسان په دُرو وهلي دي. د طالبانو سترې محکمې د چهاشنبې په ورځ (د لړم ۲۱مه) د یوې خبرپاڼې په خپرولو سره ویلي، چې یاد کسان له ۳۰ تر ۳۹ دُرو وهل شوي دي.
دا په داسې حال کې ده، چې پر افغانستان د طالبانو له واکمنېدو راهیسې په بېلابېلو سیمو کې صحرایي محکمې دوام لري.
د افغانستان انټرنشنل- پښتو د موندنو لهمخې، طالبانو په تېرو درېیو (اګسټ، سپټمبر او اکټوبر) میاشتو کې د هېواد په ۲۱ ولایتونو کې ۳۳۱ کسان د بېلابېلو تورونو له امله په عام محضر کې په دُرو وهلي دي. ډېری دغه کسان په کابل او سرپل ولایتونو کې په دُرو وهل شوي دي. په دغو کسانو کې ښځې هم شاملې دي، خو کره شمېر یې معلوم نهدی.
د بشري حقونو فعالان د طالبانو لهخوا د سزاګانو دا ډول تطبیق د بشري حقونو له اصولو او د انساني کرامت خلاف کړنه ګڼي. دوی وایي، چې په افغانستان کې دا مهال مشروع عدلي او قضایي نظام شتون نه لري او د طالبانو دغه ډول کړنې د «صحرایي محاکمو» او ناقانونه سزاګانو څرګند مثال دی.
