د طالبانو د کورنیو چارو وزارت مرستیال رحمتالله نجيب وايي، چې د ترکیې په ناسته کې پاکستان غوښتل چې طالبان په دغه هېواد کې روانه جګړه «ناروا» اعلان کړي؛ خو دوی څرګنده کړه، چې د فتوا صادرول یوازې د دارالفتوا مسوولیت دی. نوموړي زیاته کړه، له همدې امله خبرې بېپایلې پای ته ورسېدې.
هغه د یوې خبري ناستې پرمهال ویلي، د مذاکراتو پر مهال د پاکستان لوري غوښتنه وکړه چې طالبان دې په رسمي توګه فتوا صادره کړي او په پاکستان کې ټولې روانې جنګي کړنې دې ناروا اعلان کړي.
هغه زیاته کړه، چې منځګړو هېوادونو هم د یادې غوښتنې ملاتړ وکړ؛ ځکه هغوی د دواړو هېوادونو ترمنځ د حساسو مسایلو په اړه بشپړ معلومات نهلرل.
نوموړي ویلي: «طالب پلاوي په اصولي ډول موافقه څرګنده کړه، چې فتوا صادرېدای شي؛ خو روښانه شوه چې د فتوا صادرول د دارالفتوا مسوولیت دی او د دې ادارې هر تصمیم به یوازې د اسلامي قانون پر اساس وي، نه د چا د غوښتنو او خوښې پر بنسټ.»
د نجيب په خبره؛ دغه موضوع ښايي د پاکستاني لوري لپاره د منلو وړ نه وه؛ نو د همدغه اختلافانو له امله مذاکرات پرته له کومې پایلې پای ته ورسېدل.
