د ايران د بهرنيو چارو وزير سيد عباس عراقچي د روسیې له بهرنيو چارو وزير سرګي لاوروف سره په یوه ټلېفوني اړیکه کې د طالبانو او پاکستان ترمنځ د وروستي کړکېچ په اړه اندېښنه څرګنده کړې او د سيمې د هېوادونو ترمنځ د سولې او ثبات لپاره یې د ګډو هڅو پر اړتیا ټینګار کړی.
پنجشنبه د (لړم ۲۲مه) د ایران د بهرنیو چارو وزارت په خبرپاڼه کې راغلي: «د سيمې د هېوادونو ترمنځ دوامداره خبرې او همغږي د تاوتريخوالي د خپرېدو د مخنيوي او د ګډ امنيت د تضمين کیلي ده». عباس عراقچي زياته کړه، چې ايران غواړي له مسکو او د سيمې له نورو هېوادونو سره منظمې سلا مشورې وشي؛ څو د افغانستان د ډیورنډ په اوږدو کې د لا زياتو شخړو د رامنځته کېدو مخه ونيول شي او د ثبات لپاره لارې چارې ولټول شي.
د ټليفوني خبرو پر مهال دواړو لوريو د خپلو دوه اړخيزو اړيکو جاج واخيست او پر دې يې ټينګار وکړ، چې تهران او مسکو د ټولو هغو برخو د پراختيا هوډ لري چې دواړو لورو ته د علاقې وړ دي.
عراقچي وويل، امريکا او يو شمېر اروپايي هېوادونه د فلسطين د مسلې په اړه په ملګرو ملتونو کې داسې نوې هڅې کوي، چې اندېښنې يې راپورته کړې دي. ده وويل، د امنيت شورا دغه طرحه به د غزې او فلسطين خلک د پرديو تر واک لاندې کړي.
له بلې خوا، د روسيې د بهرنيو چارو وزير سرګي لاوروف د سيمې د هېوادونو ترمنځ د همکارۍ پر اهميت ټينګار وکړ. خبرپاڼه کې د هغه په حواله لیکل شوي، چې مسکو چمتو دی له تهران او نورو سيمهييزو لورو سره د ثبات او امنيت د ټينګښت لپاره خپلې سلامشورې او همغږي ته دوام ورکړي.
دغه څرګندونې داسې مهال کېږي، چې د پاکستان او طالبانو ترمنځ کړکېچ تازه پر سوداګریزې جګړې هم بدل شوی. همدا راز د قطر او ترکیې په منځګړتوب د دواړه خواوو له لوري درې پړاوه مذاکرات هم ناکام شوي او په نږدې وختونو کې دغه کړکېچ حل کېدونکی نه ښکاري.
پاکستان ادعا لري، چې پر کابل واکمنو طالبانو د دوی مخالفو ډلو «ټيټيپي» یا د پاکستاني طالبانو غورځنګ په ګډون یو شمېر نورو ډلو ته پناه ځایونه ورکړي؛ خو طالبان بیا دغه ادعاوې ردوي. پر کابل واکمن دعوه لري، چې اسلاماباد د دوی خلاف داعش وسلهوال روزي او خپله خاوره کې یې مرکزونه هم ورکړي دي.
