د طالبانو د کور او ښار جوړولو وزارت وايي، د ښارونو غیرپلاني ساحو لپاره یې د بیارغونې درې پلانونه چمتو کړي او د عملي کېدو لپاره یې اړوندو ولایتونو ته سپارلي. دغه پلانونه د ښارونو د غیرپلاني سیمو د اړتیاوو، د نفوس د تراکم او ښاري ترانسپورټ د تخنیکي ارزونې له مخې برابر شوي.
د طالبانو د کور او ښار جوړولو وزارت نن یکشنبه، د لړم ۲۵مه وویل، چې درې ویزه شوي پلانونه د فاریاب ولایت د میمنې ښار د شپږمې ناحیې د قطور ساحې، د فراه ښار د څلورمې ناحیې لوېدیځې برخې، او د بلخ ولایت د مزارشریف ښار د نهمې ناحیې د ابو ایوب انصاري سیمې پورې تړاو لري.
دوی زیاتوي،چې د کندهار ښار د چوني غیرپلاني سیمه او د نیمروز ولایت د زرنج ښار لومړۍ ناحیې ساحې (حاجي خلیل، مهاجراباد، خیراباد او نفس خان) هم سروې شوي او د رغونې د پلان لپاره د کروکي او توپوګرافۍ کارونه پرې ترسره شوي دي.
