په کابل کې د «امام ابوحنیفه» څلورم ملي او نړۍوال نندارتون سبا پرانېستل کېږي
د طالبانو د دولتي شرکتونو لوی ریاست اعلان کړی، چې سبا دوشنبه به په کابل کې د «امام ابوحنیفه» تر نوم لاندې څلورم ملي او نړۍوال نندارتون پرانېستل شي.
د طالبانو د دولتي شرکتونو لوی ریاست اعلان کړی، چې سبا دوشنبه به په کابل کې د «امام ابوحنیفه» تر نوم لاندې څلورم ملي او نړۍوال نندارتون پرانېستل شي.
د دغه ریاست په وینا، په دې نندارتون کې به د ګڼ شمېر خصوصي او دولتي شرکتونو ترڅنګ د ننګرهار وادي کرنیز دولتي شرکت هم خپل تولیدات او محصولات نندارې ته وړاندې کړي.
د نندارتون مسوولین وايي، سږکال به دغه نندارتون د سیمې او نړۍ د ۱۵ هېوادونو په ګډون د روانې میاشتې په ۲۶مه نېټه د اوو ورځو لپاره پرانېستل شي.
مسوولین زیاتوي، چې په شاوخوا ۱۸۰ غرفو کې به بهرني شرکتونه او په سلګونه نورو غرفو کې به کورني شرکتونه خپل تولیدات او نوښتونه وړاندې کوي.
د یادونې وړ ده، چې تېر کال هم د امام ابوحنیفه درېیم ملي او نړۍوال نندارتون د کورنیو او بهرنیو تولیداتو د نندارې په موخه جوړ شوی و، چې د مسوولینو په وینا، پایلې یې مثبتې او د سوداګرۍ د پراختیا لپاره ګټورې وې.
یاد ریاست بیا دا نه دی ویلي، چې په دې نندارتون کې ښځو ته هم غرفې ورکړل شوي او که نه.
