انتونیو ګوترېش پر اوکراین د روسیې وروستي بریدونه وغندل
د ملګرو ملتونو سرمنشي انتونیو ګوترېش پر اوکراین د روسیې وروستي توغندیز او ډرون بریدونه غندلي او د سمدستي او له شرط پرته اوربند پر اړتیا یې ټینګار کړی.
د ملګرو ملتونو سرمنشي انتونیو ګوترېش پر اوکراین د روسیې وروستي توغندیز او ډرون بریدونه غندلي او د سمدستي او له شرط پرته اوربند پر اړتیا یې ټینګار کړی.
ګوترېش د دغو بریدونو په غبرګون کې پر اېکس پاڼه لیکلي: «دا یو ځل بیا د بشپړ، سمدستي او له شرط پرته اوربند اړتیا په ګوته کوي، د یوې عادلانه، جامع او دوامداره سولې په لور د لومړي ګام په توګه چې د اوکراین حاکمیت، خپلواکۍ او ځمکنۍ بشپړتیا په بشپړه توګه ساتي.»
نوموړي دغه څرګندونې په داسې حال کې کړي، چې د روسیې له خوا د اوکراین په ترنوپیل ښار بریدونو کې د درېیو ماشومانو په ګډون ۲۵ کسان وژل شوي او ۶۶ نور ټپیان شوي.
روسیې د سې شنبې شپې په بریدونو کې د اوکراین پر بېلابېلو سیمو له ۴۷۰ ډېر ډرونونه او ۴۸ توغندي کارولي دي.
