په ننګرهار کې د طالبانو رسنیز دفتر خبر ورکړی، چې د دوی امنیې قوماندانۍ د تېرې اونۍ په ترڅ کې ۱۴ کسان له نشهيي توکو سره یو ځای نیولي دي. دوی وایي، «۷۵ګرامه شیشه، یو کیلو چرس، ۹زره زیکپ نشهلرونکې ګولۍ، ۲۷۲۲ټابلېټ کا ګولۍ او یوه اندازه شراب» په دغه نشهيي توکو کې شامل دي.
چهارشنبه د (لړم ۲۸مه) د طالبانو خبرپاڼې زیاته کړې، چې دغه نیول شوي کسان یې خپلو اړوندو عدلي او قضایي ادارو ته ور پېژندلي دي. دغه نیونې داسې مهال دي، چې دوه اونۍ وړاندې ملګرو ملتونو په خپل یو راپور کې اندېښنه څرګنده کړه چې په افغانستان کې د مصنوعي نشهلرونکو توکو تولید ډېر شوی دی.
که څه هم طالبان د نشهيي توکو د کاروبار د صفر کېدو ادعاوې کوي؛ خو دغه سازمان اندېښنه څرګنده کړې، چې افغانستان کې د نشهيي توکو قاچاق ډېر شوی او د کوکنارو کښت لا هم شته. راپورونو په ډاګه کړې، چې د نشهيي توکو په کاروبارونو کې د طالبانو یوشمېر لوړپوړي غړي هم ښکېل دي.
د سیمې هېوادونو په ګډون ګاونډی ایران یو له هغو هېوادونو دی، چې له افغانستان څخه د نشهيي توکو له قاچاق نه جدي اندېښنه او وېره لري. دغه هېواد په وار، وار له طالبانو سره ګډې ناستې کړې؛ څو له افغانستان نه د نشهيي توکو د قاچاق د مخنېوي په برخه کې ورسره ګډې هڅې وکړي، خو بیا هم نهدي توانیدلي چې د دغه بهیر مخه ونیسي.
ایران په تېرو څو میاشتو کې په وار، وار ځینې افغانان د نشهيي توکو په جرم خپل هېواد کې اعدام کړي او د دغه هېواد لهپاره د بشري حقونو ځینو سازمانونو اندېښنه ښوولې، چې دغه افغانان پرته له کومو مشخصو شواهدو په دار ځړول شوي دي.
