د طالبانو د سوداګرۍ وزیر هند ته د خپل سفر په ترڅ کې د کوربه هېواد د سوداګرۍ په چارو کې د دولت له وزیر سره لیدلي دي.طالبانو ویلي، دواړو لورو د اقتصادي او سوداګریزو همکاریو د پراختیا، د پانګونې د جلبولو او د سوداګرۍ د ودې لپاره د نویو فرصتونو د رامنځته کولو پر اړتیا خبرې کړې دي.
د طالبانو د صنعت او سوداګرۍ وزارت د پنجشنبې په ورځ (د لړم ۲۹مه) په یوې خبرپاڼه کې ویلي، چې په دې لیدنه کې نورالدین عزیزي «له چابهار بندر څخه د اغېزناکې استفادې، د بنسټیزو پروژو د پراختیا په ځانګړي ډول په نیمروز کې د وچو بندرونو د جوړولو، په چابهار کې د منظم بار وړولو بېړیو د چارو د پيل او په نواشِوا بندر کې د افغان سوداګرو د وارداتو او صادراتو په برخو کې د اسانتیاو د برابرېدو په اړه مهمې غوښتنې مطرح کړې.»
د طالبانو د خبرپاڼې لهمخې، په دې لیدنهکې افغان سوداګرو ته د ویزې د ورکړې پر اسانتیا او چټکتیا او همداراز د درملو، سړو خونو او د مېوود پروسس خونو پر جوړولو، پر صنعتي پارکونو او د صادراتو د پروسس پر مرکزونو د ګډو پانګونو پر پراخولو هم بحث شوی دی.
د طالبانو په خبره، هندي چارواکو د دوی د غوښتنو هرکلی کړی او ټینګار یې کړی، چې د دوه اړخیزو همکاریو د پیاوړتیا او د یادو پروګرامونو د عملي کولو لپاره به لازم اقدامات ترسره کړي.
د طالبانو د صنعت او سوداګرۍ وزیر نورالدین عزیزي د هند له بهرنیو چارو وزیر جی شنکر سره هم په لېدنه کې د چابهار بندر د فعالیتونو پر زیاتوالي، د سوداګریزو اتشو د معرفي کولو او د ویزو په برخه کې د اسانتیاو د برابرېدو په تړاو خبرې کړې دي.
