رویټرز د دوو باخبره سرچینو له قوله راپور ورکړی، چې امریکا له کییف څخه غوښتنه کړې څو د سولې هغه طرحه ومني، چې واشنګټن چمتو کړې او په کې د خاورې د ځینو برخو او د ځینو وسلو سپارل شامل دي. دغه سرچینو ویلي، چې د امریکا طرحه د اوکراین د وسلهوالو ځواکونو د شمېر کمول هم رانغاړي.
د اوکراین يوه لوړپوړي چارواکي تر دې مخکې رویټرز ته ویلي و، چې کییف د امریکا د جګړې د پای ته رسولو د وړاندیزونو «نښې نښانې» ترلاسه کړي دي؛ دغه وړاندیزونه واشنګټن له روسیې سره مطرح کړي او اوکراین په چمتو کولو کې یې هېڅ رول نه لري.
کرملین په غبرګون کې اعلان وکړ، چې د روسیې او متحده ایالاتو اړیکې روانې دي او د اړتیا په صورت کې د ولادیمیر پوتین او ډونالډ ټرمپ ترمنځ د موقتي اړیکې امکان شته. له دې سره سره بیا کرملین وایي: «لا تر اوسه د پوتین-ټرمپ د غونډې لپاره کافي لومړني کارونه ترسره شوي نه دي.»
دا په داسې حال کې ده، چې د اوکراین ولسمشر ولادیمیر زېلېنسکي د چهارشنبې په ورځ په ترکیه کې د دې هېواد له ولسمشر رجب طیب اردوغان سره وکتل او تمه ده، چې د پنجشنبې په ورځ به په کییف کې د امریکا د پوځ له چارواکو سره هم وګوري.
