د هند له لوري د طالبانو د سوداګرۍ وزیر نورالدین عزیزي د سفر له پیل سره هممهاله هندو ورځپاڼې ته د دغه هېواد ډېپلوماټیکو سرچینو ویلي، چې نوی ډیلی د افغانستان په کانونو او د اوبو برېښنا بندونو پروژو کې د پانګونې احتمالي ارزونه کوي.
سرچینو هندو ورځپاڼې ته ویلي، چې د افغانستان او پاکستان ترمنځ د سوداګرۍ له ګډوډېدو وروسته ډېری افغان سوداګرو خپل سوداګریز توکي د پاکستان پر ځای د چابهار بندر له لارې وارد کړي دي. طالبانو د صنعت او سوداګرۍ وزیر نورالدین عزیزي خپل پنځه ورځنی سفر د چهارشنبې په ورځ هند ته پیل کړی دی.
طالبان هیلهمن دي، چې د هند سره د نوې سوداګریزو اړیکو په پېلېدو سره د افغانستان تړاو د پاکستان له بندرونو سره راکم کړي. دا په تېره نږدې یوه میاشت کې د طالبانو دویم وزیر دی، چې دغه هېواد ته سفر کوي چې له هند سره د طالبانو د اړیکو د پراخېدو نښه بلل کېږي.
تر دې وړاندې د طالبانو د بهرنیو چارو وزیر امیرخان متقي هند ته سفر کړی و او هلته یې د هندي چارواکو سره د هوايي ټرانسپورټ د دهلېز د پیاوړتیا په اړه هوکړه کړې وه. دغه دهلېز د ډیلي، ممبۍ او امرتسر ښارونه له کابل او کندهار سره نښلوي.
عزیزي چې له یوه لوی پلاوي سره هند ته تللی، د سفر په لومړۍ ورځ یې د هند نړۍوال سوداګريز نندارتون نه هم لیدنه کړې. نوموړي ډیلي ته له رسېدو سره سملاسي د هند خصوصي سکټور له یوشمېر استازو سره کتنه کړې او په نندارتون کې یې د افغان سوداګرو د کرنیزو محصولاتو له غرفو نه هم لیدنه کړې ده.
هندي رسنیو راپور ورکړی، چې تر دغه سفر وروسته تمه کېږي د هند مهم صادرات افغانستان ته زیات شي چې پهکې درمل، جامې، ماشين الات، بوره، چای او وریجې شاملې دي. همدارنګه هند لېواله دی، چې د افغانستان تازه او وچه مېوه او همدارنګه کاني توکي وارد کړي؛ هغه توکي چې په هندي بازارونو کې یې تقاضا لوړه ده.
د هند ډېپلوماټیکو سرچینو ویلي، د عزیزي سفر دواړو لورو ته دغه فرصت برابروي چې د افغانستان په کانونو او د اوبو برېښنا په پروژو کې د هند د پانګونې امکانات وارزوي. سرچینو تایید کړې، چې افغانستان په وروستیو میاشتو کې د خپلې ډېری بهرنۍ سوداګرۍ لپاره د ایران د چابهار بندر څخه کار اخیستی؛ څو د پاکستان پر کراچۍ بندر خپله تکیه را کمه کړي.
تر دې وړاندې راپورونه خپاره شوي وو، چې هند غواړي د کونړ پر سیند د بند جوړونې په پروژو کې پانګونه وکړي. طالب چارواکو ویلي، چې د کونړ پر سیند بند جوړونه د دوی له لومړیتوبونو څخه دی.
تر هغه وروسته چې په استانبول کې د طالبانو او پاکستان ترمنځ مذاکرات ناکام شول؛ د طالبانو د ریاست الوزرا اقتصادي مرستیال افغان سوداګرو ته امر وکړ، چې له یاد هېواد سره خپلې هر ډول سوداګریزې راکړې ورکړې بندې کړي.
د طالبانو د سوداګرۍ وزیر د پاکستان سره د سوداګرۍ د پرېکون د فشار کمولو لپاره په روانه اونۍ کې لومړی ایران ته ولاړ او بیا د چهارشنبې په ورځ یې هند ته سفر وکړ.
