د کندهار په یو شمېر ناحیو کې د طالبانو د امربالمعروف او نهې عن المنکر محتسبینو په تازه اقدام کې یوه نوې او لانجمنه غوښتنه راپورته کړې ده. دوی له کورنیو غوښتي، چې «نافرمانه» ښځې وروپېژني چې «اصلاح» یې کړي.
دوی له ځايي اوسېدونکو غوښتي: «هغه ښځې چې د کورنیو د نارینهوو خبرې نهمني، د کور له اجازې پرته بازار ته ځي او یا سالم حجاب نه کوي» باید محتسبینو ته وسپارل شي څو «اصلاح» یې کړي.
د کندهار ښار په بېلابېلو سیمو کې د امربالمعروف محتسبین له نږدې لسو ورځو راهیسې هره ورځ په جوماتونو کې د مازدیګر او ماښام تر لمانځه وروسته له ځایي اوسېدونکو غوښتي، چې د خپلو سیمهییزو «هدایتونو» رعایت وکړي او د کورنیو هغه ښځې چې د دوی له معیارونو سره سم چلند نهکوي، محتسبینو ته یې ور وپېژني.
د کندهار ښار د نهمې ناحیې او نورو سیمو یو شمېر اوسېدونکو افغانستان انټرنشنل-پښتو ته ویلي، چې تېره شپه د ماښام له لمانځه وروسته محتسبینو د جومات دروازې تړلې وې او خلک یې له وتلو منع کړل.
د سیمې د اوسېدونکو په وینا، وسلهوال کسان د دروازې ترڅنګ ولاړ و او هغه کسان یې بېرته جومات ته ور ګرځول، چې غوښتل یې د محتسبینو د خبرو له اورېدو مخکې ووځي.
د دغې ناحیې یو اوسېدونکی وايي: «موږ عادي لمانځه ته ورغلو، خو وروسته وویل شول چې څوک نهشي وتلی، په دروازه کې وسلهوال ولاړ و او خلک یې بېرته کرځول، کله چې بېرته مسجد ته ورغلو بیا یې داسې خبرې کولې چې هغه ښځې ستاسو خبره نهمني موږ ته یې وسپارئ چې اصلاح یې کړو.»
د خلکو په خبره، محتسبینو د وینا پر مهال ادعا وکړه چې په ځینو کورنیو کې ښځې د کور د نارینه اطاعت نهکوي، «سم حجاب» نه مراعتوي او «بې اجازې له کوره وځي.»
د هغوی په خبره، دا ډول ښځې باید د امربالمعروف دفتر ته وسپارل شي.
د پنځمې ناحيې یو اوسېدونکی په دې اړه وایي: «محتسبینو ښکاره وویل، چې که ښځه د خاوند خبره نهمني او یا سم حجاب نهکوي، باید دوی ته وسپارل شي ترڅو اصلاح يې کړي، دوی وویل، نورې دا ډول ښځې دوی بندیانې کړې دي او هغوی اصلاح شوي دي او بیا یې بېرته خوشې کړې دي.»
د کندهار لپاره د طالبانو د محتسبینو دغې غوښتنې د خلکو غبرګونونه راپارولي دي. ځايي اوسېدونکي وایي، چې د ښځو «سپارل» د کورني عزت، شخصي حریم او ټولنیزو دودونو خلاف عمل دی.
د کندهار یو بل اوسېدونکی وایي: «دا خبره ډېره د بې ننګۍ ده، هېڅوک نهمني چې خپله ښځه د بل چا لاس ته وسپاري او هغه دې بندي کړي.»
د پنځمې ناحیې یوه بل اوسېدونکي هم افغانستان انټرنشنل- پښتو ته ویلي: «موږ د دیني لارښوونو احترام کوو، خو دا ډول غوښتنې د خلکو په کورنیو چارو کې ښکاره مداخله ده.»
ځايي سرچینې وایي، چې د محتسبینو دغه خبرې په یو شمېر نورو ناحیو کې هم شوې دي او خلکو ته ورته پیغام ورکړل شوی دی.
ځینې اوسېدونکي وایي، چې د محتسبینو د دې ډول تماسونو له امله ښځې له رواني فشار سره مخ کېږي او نارینه ښايي له دې غوښتنې د کور دننه د فشار د وسیلې په توګه کار واخلي.
خلک خبرداری ورکوي، چې دا چلند د کورنیو ترمنځ شخړې زیاتولای شي او د خلکو او دیني ادارو ترمنځ فاصله رامنځته کوي.
د کندهار ولایت لپاره د طالبانو د امربالمعروف سیمهییز دفتر بیا د خلکو د غبرګونونو او اعتراضونو په اړه رسمي نظر نهدی اعلان کړی.
دا په داسې حال کې ده، چې څه موده مخکې د طالبانو د امربالمعروف او نهې عن المنکر وزارت محتسبینو په پلازمېنه کابل کې هم یو شمېر نجونې او ښځې د دوی په باور «بې حجابه» نیولې وې او د دوی دغې چارې ګڼ غبرګونونه راوپارول او ورسره اوس د اړتیا لهمخې له کوره وتونکې ښځې سختې اندېښمنې دي او په وېره تګ راتګ کوي.
دا په داسې حال کې ده، چې پر افغانستان د طالبانو له واکمنېدو وروسته دغې ډلې پر افغان ښځو سخت بندیزونه لګولي دي. ښځې له زده کړو، کار، سفر او ګڼو عامه فعالیتونو څخه محرومې شوې دي، د هغوی تګ راتګ محدود شوی، حجاب سخت شوی او د ټولنیزې ونډې لپاره د پام وړ خنډونه رامنځته شوي دي. د دې بندیزونو له امله د ښځو شخصي، اقتصادي او ټولنیز ژوند سخت اغېزمن شوی او ډېرې یې له بنسټیزو حقونو بېبرخې پاتې شوې دي.
