د طالبانو د اقتصاد وزیر دینمحمد حنیف او په کابل کې د ایران سفارت سرپرست عليرضا بېکدلي د یوې کتنې پر مهال د دوه اړخیزو اقتصادي او سوداګریزو اړیکو د پراختیا، په ایران کې د مېشتو افغان کډوالو د وضعیت او د بشري مرستو د دوام په اړه خبرې کړې دي.
د طالبانو اقتصاد وزارت د یکشنبې په ورځ (د لیندۍ ۲مه) د یوې خبرپاڼې په خپرولو سره ویلي، دین محمد حنیف په دې کتنه کې د دوه اړخیزو اقتصادي او سوداګریزو اړیکو او همداراز د بشري مرستو د دوام په برخو کې د علي رضا بېکدلي هڅې ستایلې دي.
علي رضا بېکدلي په دې کتنه کې په ډاګه کړه، چې د دواړو هېوادونو ترمنځ اقتصادي او سوداګریزې اړیکې مخ په پراختیا دي او همداراز یې د دوی اقتصادي پالیسۍ هم وستایلې.
نوموړي په افغانستان کې د انرژۍ، ټرانسپورټ او سوداګرۍ په برخو کې د ایراني پانګهوالو د لېوالتیا په اړه هم خبر ورکړ.
له پاکستان سره د طالبانو د سوداګریزو اړیکو له پرېکون او د پاکستان له لوري پر ډيورند کرښه د دروازو له تړل کېدو وروسته د منځنۍ اسیا او ایران استازو له افغانستان سره د سوداګریزو چارو د پراختیا لپاره خپلې هڅې ګړندۍ کړې دي.
د یادونې وړ ده، چې ایران د پاکستان په څېر په دې وروستیو کې څه باندې یو میلیون افغان کډوال په زوره بېرته افغانستان ته استولي او دغه بهیر همداراز دوام لري. په ایران کې مېشت افغان کډوال بیا تل د ایراني پولیسو له ناسم چلند څخه شکایت لري.
