د طالبانو د سترې محکمې رييس عبدالحکیم حقاني د هېواد د ټولو اختصاصي محکمو قضايي غړو ته د ظرفیت لوړونې سیمنار په پرانېست غونډه کې د عدالت نهپلې کېدل او د مظلوم غږ نهاورېدل د سقوط عوامل وبلل. یو شمېر هېوادوال بیا د طالبانو په محکمو کې د قضايي بهیر له اوږدېدو شکایت لري.
عبدالحکیم حقاني د یکشنبې په ورځ (د لیندۍ ۲مه) د سترې محکمې په قضايي زده کړو عمومي ریاست کې د هېواد د ټولو اختصاصي محاکمو قضايي غړو ته د ظرفیت لوړونې د جوړ شوي سیمینار په پرانېست غونډه کې د اسلامي او قضايي نظام د استحکام، عدالت پلي کېدو او د تېرو خلافتونو د زوال د لاملونو په تړاو وویل: «د عدالت نهپلي کېدل، د مظلوم غږ نهاورېدل او د ظالم د ظلم مخه نهنيول هغه عوامل دي چې پخواني خلافتونه يې له زوال او سقوط سره مخ کړل.»
نوموړي د محاکمو له ټولو قضايي غړو او ګډونوالو وغوښتل، چې د عدالت په پلي کولو کې پوره هڅه وکړي.
یو شمېر هېوادوال بیا په محکمو کې د قضايي بهیر له اوږدېدو شکایت لري او له اړوندو مسوولینو غواړي، چې قضايي دوسیو ته یې باید په بېړه رسېدنه وشي.
د سترې محکمې د خبرپاڼې لهمخې، په دغه قضايي سیمینار کې چې دوه اوونۍ به دوام وکړي، د هېواد د ټولو اختصاصي محاکمو ۸۸ قضايي غړو ګډون کړی دی.
د یادونې وړ ده، چې د طالبانو مشر هبتالله اخوندزاده او عبدالحکیم حقاني دوه داسې کسان دي، چې د جرمونو د نړۍوالې محکمې له لوري یې د بشري حقونو د نقض په تړاو د نیولو حکمونه صادر شوي دي.
