د جمعیت ګوند څو کاله مخکې او جنبش ګوند همدا څو ورځې مخکې په دوو ټوټو ووېشل شول. له دې سره هممهاله وحدت ګوند د خپلې دویمې سراسري کنګرې له ترسره کېدو خبر ورکړ. په بهر کې د مېشتو ګوندونو دغه ډول هڅې په داسې حال کې دي، چې د طالبانو په واکمنۍ کې د ګوندونو هر ډول فعالیت منع شوی دی.
د وحدت ګوند د یکشنبې په ورځ (د لیندۍ ۲مه) په انلاین بڼه خپله دویمه سراسري کنګره د شاوخوا ۳۰۰ کسانو په ګډون سره جوړه کړه. په دې کنګره کې محمد محقق بیا ځلي د دغه ګوند د مشر او مرکزي شورا د رييس په توګه غوره شو او د دوو ښځو په ګډون ۷ کسان یې د مرستیالانو په توګه اعلان شول.
د دغه ګوند له لوري د خپرې شوې خبرپاڼې لهمخې، په دې کنګره کې له ټاکنو سربېره د وحدت ګوند نوی بیرغ او نوی ژمنلیک هم تصویب شو.
محمد محقق په افغانستان کې نامساعد وضعیت ته په کتو د ترکیې په ګډون له ګاونډيو هېوادونو له دې امله مننه وکړه، چې د سیاسي څېرو په ګډون یې له یو شمېر افغانانو سره همکاري کړې ده.
د محقق دغه مننه په داسې حال کې ده، چې پاکستان او ایران یوازې د روان کال له پیل څخه تراوسه څه باندې یو میلیون افغانان په زوره اېستلي او ډېری یې داسې دي چې په لومړي ځل افغانستان ته اړول کېږي او هلته د اوسېدو لپاره هېڅ امکانات نهلري.
د دغه ګوند د خبرپاڼې پر بنسټ، دغه نوي تشکیلات د پنځو کلونو لپاره تایید شوي دي.
د وحدت ګوند کنګره په داسې حال کې ده، چې څو کاله پخوا د کنګرې د نهدایرېدو له امله د جمعیت ګوند دوه ټوټې شو، چې د یوه مشري یې صلاحالدین رباني او د بلې یې عطامحمد نور کوي او همداراز د جنبش ګوند هم همدا څو ورځې مخکې انشعاب وکړ او په داسې حال کې چې عبدالرشید دوستم د جنبش ګوند مشر دی، نظامالدین قیصاري هم ځان د دغه ګوند نوی رييس اعلان کړ.
د شنونکو په باور، په افغانستان کې د ګوندونو مشري معمولا میراثي وي او ډېر کم داسې پېښېږي، چې خپلې کنګرې جوړې او ټاکنې وکړي.
د یادونې وړ ده، چې طالبانو په افغانستان کې له بیا واکمنېدو سره سم په افغانستان کې ټول ګوندونه لغو اعلان کړل او هر ډول فعالیت یې منع کړ او همداراز د حزب اسلامي له مشر پرته د نورو ګوندونو مشرتابه ټول له هېواده بهر او په ځانګړې توګه په ترکیه کې ژوند کوي.
دا پروژه د افغان ویلفیر ټولنې په همکارۍ او د طالبانو د کرنې، اوبو لګولو او مالدارۍ وزارت او ځایي مسوولینو په همغږۍ سره پلي کېږي.
دغه پروژه چې ۸۸۳زره او ۴۲۳ډالره ارزښت لري، په پام کې لري چې د لوګر ولایت په څلورو ولسوالیو کې ۲,۰۰۰کورنیو ته د کرنې د مرستو پکیجونه ووېشي، چې هرې کورنۍ ته ۵۰کیلوګرامه اصلاح شوي د غنمو تخمونه، ۵۰کیلو یوریا سرې او ۵۰کیلو فاسفیټ سرې ورکول کېږي.
په دې پروژه کې د بزګرانو د روزنې او کرنیزو مشورو پروګرامونه هم شامل دي، چې بزګران به د افتونو د کنټرول او د غنمو د کرنې د ښه مدیریت په اړه وروزل شي.
د پروژې د پرانېستې غونډه د لوګر ولایت په خروار ولسوالۍ کې وشوه، چې د ولسوالۍ مشر، د طالبانو د اړوندو حکومتي ادارو استازو، د ټولنې مشرانو او د قطر سرې میاشت د استازولۍ د دفتر غړو برخه په کې اخیستې وه.
د دوو ورځو په موده کې د خروار ولسوالۍ ۵۰۰بزګرې کورنیو ته کرنیز توکي ووېشل شول.
