د کډوالو د حقونو د څار سازمان نن سې شنبه (د لېندۍ ۴مه) په یوه اعلامیه کې ویلي، چې پاکستاني پولیس تېره شپه د ارجنتینا پارک ته ننوتلي او هڅه یې کړې هغه افغان پناهغوښتونکي له هغه ځایه وباسي، چې له تېرو درېیو میاشتو راهیسې د خیمو لاندې پاتې وو.
دغه سازمان د پاکستان پر حکومت غږ کړی، چې دغه ډول کړنې سمدلاسه ودروي او له کډوالو ساتنه وکړي.
په راپور کې د عیني شاهدانو له قوله لیکل شوي، چې پولیسو د عملیاتو پر مهال له زور او تاوتریخوالي کار اخیستی او د ښځو په ګډون یې ځینې پناه غوښتونکي وهلي دي. د دغه سازمان په وینا، ډېری کورنۍ وېره لري، چې په جبري توګه افغانستان ته ستانه کېږي، چې دا کړنه به زیان منونکې کورنۍ له جدي ګواښ سره مخ کړي.
دغه سازمان ټینګار کوي، په یاد پارک کې مېشتې کورنۍ چې ښځې، ماشومان او ډېر عمر لرونکي کسان په کې شامل دي، هېڅ بدیل سرپناه یا رسمي ملاتړ نه لري او هر ډول جبري ستنول به یې د ژوند او امنیت لپاره جدي ګواښ رامنځته کړي.
د کډوالو د حقونو د څار نړۍوال سازمان له نړۍوالو سازمانونو، هېوادونو، ملګرو ملتونو، د کډوالو نړۍوال سازمان، د بښنې نړۍوال سازمان، د کډوالو عالي کمېشنري او د پاکستان له حکومت څخه غوښتنه کړې، چې سملاسي دې د افغان کډوالو د اېستلو او نیولو لړۍ ودروي، د ټولو اغېزمنو کورنیو خوندیتوب، کرامت او هوساینه ډاډمنه کړي، بېړنۍ مرستې چمتو او د ساتنې یوه شفافه پروسه جوړه کړي.
دغه سازمان همدا راز له رسنیو، د بشري حقونو له فعالانو او نورو شریکانو غوښتنه کړې، چې د دې وضعیت په راپور ورکولو او شریکولو سره د دغو زیانمنو پناه غوښتونکو د خونديتوب ملاتړ وکړي.
دا په داسې حال کې ده، چې تېره شپه شاوخوا یوه بجه پاکستاني پولیسو په ارجنټینا پارک کې د افغان کډوالو پر خیمو چاپه ووهله او څه باندې ۲۰۰ کسان یې د حاجي کمپ په نوم د کډوالو د لېږد مرکز ته انتقال کړل. ویل کېږي، چې پولیسو د ښځو په ګډون څو کسان وهلي او ټکولي هم دي.
لانګ وار ژورنال رسنۍ وایي چې د دغه پروګرام له خوا په خپاره شوي اعلان کې راغلي چې ۱۰ میلیونه ډالر د دې شبکې پر مشر «اسامه محمود» او ۵ میلیونه ډالر یې د هغه پر مرستیال«عاطف یحیی غوري» ټاکلي دي.
د امریکا د بهرنیو چارو وزارت دغه اعلان د ۲۰۲۵م کال د نومبر پر ۲۴مه کړی، او ویلي یې دي چې محمود او غوري له نږدې یوې لسیزې راهیسې د «القاعده د هند په لویه وچه کې» شبکې په مشرۍ او مهمو عملیاتي فعالیتونو کې کليدي رول لري.
د امریکا د بهرنیو چارو وزارت په وینا، د القاعده ډلې دا څانګه د طالبانو په ملاتړ او اجازه د افغانستان له خاورې فعالیت کوي او د القاعدې مرکزي مشرۍ سره د اسیا په جنوب او منځ کې د عملیاتو په تنظیم او همغږۍ کې مرسته کوي.
په افغانستان، پاکستان، هندوستان، بنګلهدېش، برما او سیمهییزو هېوادونو کې د ډلو د اړیکو او فعالیتونو د اسانتیا لپاره دا ډله یوه مهمه کړۍ بلل کېږي.
القاعده د هند په لویه وچه کې شبکه په ۲۰۱۴م کال کې د القاعده مخکیني مشر ایمن الظواهري په یوه ویډیویي پیغام کې اعلان کړه. هغه وخت الظواهري وویل چې دا شبکه د پام وړ دوو کلونو هڅو وروسته د مجاهدینو د متحد کولو لپاره رامنځته شوې او د طالبانو د پخواني مشر ملا عمر مجاهد تر امر لاندې فعالیت کوي.
ایمن الظواهري د ۲۰۲۲م کال په جولای کې په کابل کې د طالبانو په یوه خوندي کور کې د امریکا د بېپیلوټه الوتکې په برید کې ووژل شو.
دا ډله د اعلان له وخته د سیمې په ګڼو ترهګریزو بریدونو کې ښکېله ګڼل شوې ده، چې پکې د پاکستان د سمندري ځواکونو د بېړیو د نیولو هڅه او د امریکا او هند پر جنګي بېړیو احتمالي بریدونه شامل دي.
ددې شبکې د رامنځته کېدو اصلي هسته په کراچۍ کې ګڼل کیږي او ډېری غړي یې هم د پاکستان د هغو جهادي ډلو غړي دي چې یو وخت یې ددغه هېواد له څارګرو ادارو سره نږدې اړیکې پاللې.
دغه شبکې د طالبانو ترڅنګ د افغانستان د بیا نیولو په جګړه کې هم برخه اخیستې وه. د راپورونو له مخې، د « ای کیو اې ایس» یو شمېر قوماندانان او جنګيالي د طالبانو په نظامي جوړښت کې ځای پر ځای شوي او ځینې یې د طالبانو په اوسني حکومت کې دندې لري.
د امریکا حکومت «ای کیو اې ایس» ډله په ۲۰۱۶م کال کې د «بهرنیو ترهګرو سازمانونو» په نوملړ کې شامله کړې وه.
امریکايي چارواکي وایي چې محمود او غوري د افغانستان په ۱۳ولایتونو کې د القاعده د روزنیزو کمپونو، خوندي مرکزونو، دیني مدرسو، تبلیغاتي مرکزونو او د وسلو د زېرمو په جوړولو او پیاوړي کولو کې مهم رول لوبولی دی.
اسامه محمود څوک دی؟
اسامه محمود، چې په ابو زر، عطاالله او زر ولي هم مشهور دی، د«القاعده د هند په لویه وچه کې» ډلې د لومړي مشر عاصم عمر له وژل کېدو وروسته د دې شبکې مشري په غاړه واخیسته.
محمود مخکې د دغه شبکې ویاند و او د القاعده د رسنیز مرکز «السحاب» په ګڼو ویډیوګانو او پیغامونو کې لیدل شوی دی.
هغه یو پاکستانې وګړې دی او د امریکا په وینا، باور کېږي چې په افغانستان کې پټ دی.
امریکا محمود په ۲۰۲۲م کال کې د «نړیوال ترهګر» په نوم نوملړ کې شامل کړی و.
غوري هم دپاکستان تبعه او دنړیوال اسلامي پوهنتون پخوانی محصل دی؛ دا هماغه پوهنتون دی چې د «القاعده د هند په لویه وچه کې» ډلې پخوانی مرستیال احمد فاروق پکې زده کړي کړې وې.