د ایران د ملي امنیت عالي شورا منشي علي لاریجاني ویلي چې هېواد یې د پاکستان، هند او افغانستان ترمنځ د سولې د ټینګښت لپاره هر ډول همکارۍ ته چمتو دی او حتا که پاکستان غواړي دوی به د یادو مسایلو د حل لپاره «سپین چېک» په واک کې ورکړي.
لاریجاني دا څرګندونې له یوې پاکستانۍ رسنۍ سره د مرکې پر مهال کړې دي.
هغه پر ایکس ولیکل، چې مرکیالې ورڅخه وپوښتل چې ایا د پاکستان او هند، او همدارنګه د پاکستان او افغانستان ترمنځ د سولې د رامنځته کولو لپاره څه کولو ته چمتو یاست؟ نوموړې وړاندې وايي، « زما ځواب روښانه و چې «پاکستان د ایران خلکو ته ډیر ګران او دروند هېواد دی، او موږ چمتو یو چې د دغو موضوعاتو د حل لپاره پاکستان ته یو سپین چک ورکړو؛ هر وخت چې یې اړتیا وي، کارولی یې شي».
لاریجاني زیاته کړې چې ایران د سیمې د ثبات، د اړیکو د ښهوالي او د شخړو د کمېدو لپاره د رغنده رول لوبولو ته تیار دی.
د چارو شنونکو په باور، دغه څرګندونې داسې مهال دي، چې هند او پاکستان د بلوچ وسله والو پر سر په خپل منځ کې ستونزې لري او څه موده وړاندې یې د یوه او بل پرخاوره هوايي او توغندويي بریدونه هم وکړل.
