طالبانو په نیمروز کې د تاریخي ځایونو د غېرقانوني کېندنو په تړاو ۹ کسان نیولي دي
د طالبانو د اطلاعاتو او کلتور وزارت وایي، چې د یادې ډلې امنیتي ځواکونو د نیمروز ولایت په چخانسور ولسوالۍ کې د تاریخي ځایونو د غېرقانوني کېندنو په تړاو ۹ کسان نیولي دي.
د طالبانو د اطلاعاتو او کلتور وزارت وایي، چې د یادې ډلې امنیتي ځواکونو د نیمروز ولایت په چخانسور ولسوالۍ کې د تاریخي ځایونو د غېرقانوني کېندنو په تړاو ۹ کسان نیولي دي.
د طالبانو تر واک لاندې ملي ټلویزیون د اطلاعاتو او کلتور وزارت له قوله راپور ورکړی، یاد شمېر کسان تر هغه وروسته ونیول شول چې غوښتل یې د یوې تاریخي کلا شاوخوا کې کېندنې وکړي.
دا په داسې حال کې ده، چې طالبانو څو ځله ټینګار کړی، چې د دې ډلې د مشر د فرمان له مخې د تاریخي اثارو ساتنه د ټولو خلکو ګډ مسوولیت دی او دوی به په دې برخه کې له هېڅ سرغړونې څخه سترګې پټې نه کړي.
د طالبانو تر واک لاندې افغانستان کې د قانون او د شفافو او حساب ورکوونکو میکانیزمونو نه شتون د دې لامل شوی، چې د هېواد فرهنګي او تاریخي میراثونه د غلا، قاچاق او ناوړه استفادې له جدي ګواښونو سره مخ شي. د څارونکو په وینا، د مسوولیتناپذیرې ادارې، کمزورې څارنې او د شفافیت له نشتوالي څخه ناوړه ګټه اخیستل کېږي، چې پایله یې د هغو اثارو له منځه وړل او قاچاق دی، چې د افغانستان د زرګونو کلونو تاریخ او هویت تمثیل کوي.
