طالبان وايي له هرات څخه نږدې ۲۰میلیونه کیلوګرامه وچه مېوه بهر ته صادره شوې

په هرات کې د طالبانو د والي ویاند محمد یوسف سعید ویلي، چې د روان کال په لومړیو اوو میاشتو کې له هرات څخه ۱۹،۹۷ میلیونه کیلوګرامه وچه مېوه اتریش، بلجیم، کاناډا، هالنډ، جرمني، امریکا، ایران، قطر، ترکیې، هند او سعودي عربستان ته صادره شوې ده.

په هرات کې د طالبانو د والي ویاند پر خپل اېکس لیکلي، چې له هرات څخه بهرنیو هېوادونو ته د وچو مېوو په صادراتو کې بادام، پسته، وچ انځر، مندتې، کشته، ممیز، الو بخارا، د پستې مغز، چارمغز، ممپلي او نخود شامل وو، چې ټولیز ارزښت یې ۵۷۷۰۳۱۹۶ ډالرو ته رسېږي.

نوموړي ویلي، چې له هرات څخه نورو هېوادونو ته د مېوو په صادراتو کې د تېرکال د ورته مودې په پرتله درې برابره زیاتوالی راغلی دی.