رویټرز خبري اژانس د خپلو سرچینو په حواله راپور ورکړی، د امریکا ولسمشر ډونالډ ټرمپ د وېنزویلا ولسمشر نیکولاس مادورو سره په ټیلیفوني خبرو کې هغه ته د جمعې تر ورځې (د لېندۍ ۸مې) پورې وخت ورکړی و چې له خپلې کورنۍ سره له وېنزویلا ووځي.
د راپور له مخې؛ وروسته له هغه چې مادورو د دغه ضرب الاجل په پوره کولو کې پاتې راغی، هغه د شنبې په ورځ د یاد هېواد د هوايي حریم د تړلو امر وکړ. په راپور کې راغلي، دغه خبرې د تېرې نومبر میاشتې په ۲۱مه پر وېنزویلا د امریکا د فشارونو تر زیاتېدو وروسته شوې دي.
ورته مهال مادورو او د هغه حکومت د امریکا لهخوا لګول شوي ټول تورونه رد کړي او ویلي یې دي، چې متحده ایالات د رژیم بدلون غواړي؛ ترڅو د وېنزویلا د پراخو طبیعي سرچینو کنټرول ترلاسه کړي.
