سناتور جوش هاولي د یوه افغان لهخوا پر ملي ګارډ له ډزو وروسته یو ځل بیا خپل پخوانی وړاندیز شوی پلان د امریکا کانګرس ته وړاندې کړ او غوښتنه یې وکړه، چې د امریکا د کورنیو چارو وزارت دې په جدي او بشپړ ډول د هغو افغان کډوالو تفتیش وکړي، چې له ۲۰۲۱ کال وروسته امریکا ته لېږدول شوي دي.
د رحمانالله لکڼوال په نوم د یوه افغان کډوال لهخوا په واشنګټن کې د ملي ګارډ پر دوو غړو د ډزو څو ورځې وروسته، سناتور هاولي فاکس نیوز ته ویلي: «جو بایډن یوازې د افغانستان څخه زموږ د وتلو په چارو کې تېروتنه نه ده کړې، بلکې هغه د زرګونو افغانانو په امریکا کې د داخلېدو له لارې امریکایان هم له ګواښ سره مخ کړي دي. موږ باید له خپلو اتلانو څخه ساتنه وکړو او یقیني کړو، چې هر هغه څوک چې امریکا ته داخلیږي، زموږ د خلکو لپاره ګواښ نه دی.»
سناتور هاولي د یادې طرحې وړاندیز په ۲۰۲۱ کال کې له افغانستان څخه د امریکايي ځواکونو له وتلو وروسته هم کړی و، خو د امریکا کانګرس د نوموړي طرحه تایید کړې نه وه.
دا په داسې حال کې ده، چې که دا طرحه تایید شې نو له مخې به یې د امریکا د کورنیو چارو وزارت د ټولو افغانانو د بایومیټریک او شخصي معلوماتو تصدیق او ثبت پیل کړي، د تفتیش لپاره به هر کډوال سره حضوري مرکې وشي او ترڅو چې تفتیش نه وي بشپړ شوی، تر هغه وخته به د فدرال مرستې پر کډوالو بندې وي.
همدارنګه د یادې طرحې له مخې، د امریکا د کورنیو چارو وزارت اړ دی چې په هرو څو میاشتو کې به د تفتیش د پرمختګ په اړه کانګرس ته راپور ورکړي.
د افغان کډوالو د تفتیش لپاره د دغې نوې طرحې وړاندیز یو ځل بیا پر داسې مهال کېږي، چې د بایډن تر مشرۍ لاندې د رحمانالله لکڼوال په نوم امریکا ته تللي یو افغان کډوال څو ورځې وړاندې په واشنګټن کې د ملي ګارډ پر دوو غړو ډزې وکړې، چې له امله یې سارا بیکستروم مړه شوه او د ملي ګارډ بل غړی لا هم د مرګ او ژوند ترمنځ مبارزه کوي.
