د دوشنبې په ورځ د اسیا په ځینو برخو کې د مرګونو سېلابونو او ځمکې ښویېدنې له امله د مړو شمېر له ۱۱۰۰ څخه واوښت. د راپورونو له مخې؛ له دې ډلې سریلانکا او اندونیزیا هېوادونه تر ټولو ډېر ځپل شوي دي.
دغه سېلابونو او ځمکې ښویېدنې ټایلنډ، مالیزیا، اندونیزیا او سریلانکا هېوادونه سخت اغېزمن کړل. یوازې په اندونیزیا کې د سېلابونو او ځمکې ښویېدنې له امله لږترلږه ۵۹۳ کسان مړه او نږدې ۴۷۰ تري تم دي. ځایي چارواکي وایي، چې تر یو مېلیون ډېر کسان اغېزمن شوي هم دي.
د سریلانکا حکومت بیا د نړۍوالو مرستو غوښتنه وکړه او د ډیتوا توپان، سېلابونو او ځمکې ښویېدنې له امله بندپاتې کسانو ته د رسېدو لپاره یې پوځي چورلکې وکارولې. د سریلانکا چارواکو د دوشنبې په ورځ وویل، چې د ډیتوا توپان، سېلابونو او ځمکې ښویېدنې له امله لږترلږه ۳۵۵ کسان مړه او ۳۶۶ نور تري تم دي.
په سویلي ټایلنډ کې بیا سېلابونو لږترلږه ۱۷۶ کسان مړه کړي دي. په مالیزیا کې بیا سېلابونو درې کسان مړه کړي دي.
