د امریکا ولسمشر ډونالډ ټرمپ ویلي، چې ولادیمیر پوتین غواړي د اوکراین جګړه پای ته ورسوي او بېرته عادي وضعیت ته ستون شي. ټرمپ زیاته کړې، د جګړې په پیل کې داسې یو مناسب فرصت و چې اوکراین کولای شوای له روسیې سره جوړجاړی وکړي؛ خو دغه فرصت له لاسه ووت.
ټرمپ دغه څرګندونې پرون چهارشنبه (د لېندۍ ۱۲مه) سپینې ماڼۍ کې د کابینې په ناسته کې کړې دي. د هغه په وینا؛ اوکراین اوس له ډېرو ستونزو سره مخ دی او د جګړې د پای ته رسولو لپاره شرایط د پخوا پرتله سخت شوي.
هغه د غزې د وروستي وضعیت یادونه هم کړې او ویلي یې دي، چې په سیمه کې تاوتریخوالی دوام لري؛ خو د منځني ختیځ د ثبات لپاره هڅې روانې دي. دا په داسې حال کې ده، چې تر دې وړاندې کرملېن ویلي و، چې روسیې د اوکراین د جګړې پای ته رسولو په تړاو د امریکا ځینې وړاندیزونه منلي او ځینې نور یې رد کړي دي.
