د روسیې د دفاع وزارت د یکشنبې په ورځ اعلان وکړ چې هوايي دفاعي ځواکونو یې د شپې۷۷ اوکرایني ډرونونه غورځولي دي. دغه ډرونونه د جنوبي او مرکزي روسیې د ۷ سیمو په فضا او د روسیې تر ولکې لاندې کریمیا کې نسکور شوي دي.
د روستوف د سیمې والي یوري سلیوسار ویلي چې په سرحدي روستوف ولایت کې د برېښنا لېږد یوه ستنه زیانمنه شوې چې له امله یې شاوخوا ۲۵۰اوسېدونکي له برېښنا بېبرخې شوي، خو مرګژوبله نه ده شوې.
د روسیې د دفاع وزارت د معلوماتو پر بنسټ، ۴۲ ډرونونه په ساراتوف او ۱۲ ډرونونه په روستوف سیمه کې ویجاړ شوي دي.
روسی چارواکي ډېر کم د اوکراین د هوايي بریدونو د زیان په اړه معلومات خپروي او هېڅکله پر خپلو پوځي اهدافو د هغو پر لګېدو اعتراف نه کوي.
د سوریې لنډ مهالي ولسمشر احمد الشرع د دوحې فورم په ۲۳مه غونډه کې وویل، د سوریې په اوسني دولت کې ټولې ډلې حضور لری او د مذهب او قومیت پر بنسټ د واک وېشنه «لویه تېروتنه» ده. هغه په ډاګه کړه، چې تر راتلونکو څلورو کلونو به ولسمشریزې ټاکنې وشي.
احمد الشرع د شنبې په ورځ (د لیندۍ ۱۵مه) په دوحې فورم کې په ډاګه کړه: «د سوریې په حکومت کې مشارکت له سهمیه بندۍ پرته ترسره کېږي او د اساسي قانون د اعلامیې لهمخې به ولسمشریزې ټاکنې تر راتلونکو څلورو کلونو ترسره شي.»
هغه همداراز وویل، د ولسمشریزو ټاکنو دغه موده د انتقالي پړاو له الزاماتو سره برابره ده او زیاته یې کړه: «موږ په تېرو ۶۰ کلونو کې په انزوا کې ژوند کړی دی.» او په وینا یې: «اوس به د امریکا د بندیزونو په لرې کېدو سره اقتصادي وضعیت ښه شي.»
الشرع همداراز څرګنده کړه، سوریه اوس یو قانونمند هېواد دی او پهکې د ټولو حقونه تضمین شوي او همداراز یې د اسراییل تېریو ته په اشارې په ډاګه کړه: «اسراییل پر سوریې د څه باندې زرو بریدونو او یرغلونو په دوام هڅې کوي په غزه کې د عام وژنې له مسوولیت څخه د تېښتې لاره ومومي.»
د هغه په وینا، نړۍواله ټولنه هم د سوریې له خاورې د اسراییل د شاتګ له غوښتنې هم ملاتړ کوي او زیاته یې کړه، ښه دا ده چې اسراییل د ۱۹۷۴ کال پر توافق ودرېږي، ځکه «دا سوریه ده چې پرې برید کېږي، نه برعکس د دې.»
د سوریې لنډ مهالي ولسمشر همداراز روښانه کړه، چې د واشنګټن په مشارکت خبرې روانې دي، څو د سوریې له خاورې اسراییل شاتګ وکړي.
د امریکا د سرحدي ګزمې مشر مایکل بنکس اعلان کړی، چې ټول هغه پناهغوښتونکي چې له ناقانونه ننوتلو وروسته نیول شوي، باید پنځه زره ډالره جریمه ورکړي. د بنکس په وینا، دا لګښت پر ټولو هغو کسانو تطبیق کېږي، چې عمر یې له ۱۴ کلونو پورته وي او پرته له قانوني معاینې امریکا ته داخل شوي وي.
مایکل بنکس پر اېکسپاڼې لیکلي: «دا پیغام د ټولو ناقانونه بهرنیانو لپاره دی، پرته له دې چې له کوم ځای څخه امریکا ته ورننوتي، څومره وخت یې دلته تېر کړی، اوس چېرې دي او د هغوی د کډوالۍ قانوني چارې روانې دي او که نه.»
دا خبر وروسته له هغه خپور شو، چې د پنجشنبې په ورځ ۲۱ زره او ۵۰۰ پناهغوښتوونکو د امریکا پر حکومت حقوقي دعوې ثبت کړې. دغه پناهغوښتونکي له ورځنیو ۹۹۸ ډالرو جریمې سره مخ دي، چې د هر کس لپاره دا لګښت تر ۱،۸ میلیونو ډالرو پورې رسېدای شي.
د امریکا د کورني امنیت ادارې په اکټوبر کې ویلي و، هغه پناهغوښتوونکي چې د بشري لنډمهالې ویزې پر اساس امریکا ته داخل شوي او د ویزې د پای ته رسېدو وروسته پاتې دي، هغوی به هم له زر ډالرو جریمې سره مخ شي.
دغه وزارت په دې وروستیو کې د ناقانونه پناهغوښتوونکو د رضاکارانه ستنېدو طرحه هم پیل کړې. د دې طرحې له مخې، ټول غېرقانوني پناهغوښتوونکي کولای شي خپل هېواد ته وړیا الوتنه او د رضاکارانه وتلو په بدل کې زر ډالره انعام ترلاسه کړي.
امریکايي حکومت وړاندې ویلي و، چې د ۲۰۲۵ مالي کال تر دې دمه لږ تر لږه ۲۳۷ زره او ۵۶۵ پناهغوښتوونکي د سرحدي ځواکونو له خوا نیول شوي دي.
تریشیا مکلاکلین چې د کورني امنیت ادارې مرستیاله ده، په اکټوبر کې فاکسنیوز ته ویلي و، چې حکومت «د تاریخي ریکارډونو د ماتولو په درشل کې دی» او احتمال شته چې د روان کال تر پایه د اخراج شویو کسانو شمېر ۶۰۰ زرو ته ورسېږي.
د هغې په وینا، یوازې سږ کال له دوو میلیونو ډېر ناقانونه پناهغوښتوونکي له امریکا وتلي دي، چې ۱،۶ میلیونه یې رضاکارانه بېرته تللي، ۵۱۵ زره اېستل شوي او ۴۸۵ زره لومړی نیول شوي او بیا اېستل شوي دي.
ډونالد ټرمپ له بیا واکمنېدو وروسته د امریکا سوېلي پوله لا پیاوړې کړې، ډېر ځواکونه یې سیمې ته لېږلي او «له نیول کېدو وروسته خوشې کېدو» تګلاره یې ختمه کړې، هغه تګلاره چې له مخې یې پناهغوښتوونکي د خپلو دوسیو تر څېړلو پورې ازاد پاتې کېدل.
د ګوا په سوېل لوېدیځ کې په یوه کلي کې د اور لګېدو له امله د درېیو ښځو په ګډون لږ تر لږه ۲۳ کسان مړه شوي دي. پولیسو ویلي، چې د قربانیانو ډېری برخه د کلپ کارکوونکي دي او اورلګېدنه ښايي د شنبې په شپه ناوخته د پخلنځي دننه د ګاز د ډبې د چاودنې له امله رامنځته شوې وي.
هندي رسنیو راپور ورکړی، چې د اور وژنې څو موټر د پېښې ځای ته لېږل شوي او د ژغورنې عملیات لا هم روان دي؛ خو پولیس وایي چې اور اوس کنټرول شوی دی.
د ګوا د پولیسو مشر الوک کومار ویلي، چې ډېری جسدونه له پخلنځي ترلاسه شوي او دوه نور جسدونه د دغه کلپ په بله برخه کې موندل شوي دي. هغه زیاته کړې، چې د اورلګېدنې اصلي لامل لا تر اوسه معلوم نه دی.
د ګوا اعلی وزیر پراموډ ساوانټ ویلي، چې د دغه کلپ د مدیریت او هغو چارواکو پر وړاندې به قانوني اقدام وکړي، چې د خوندیتوب د اصولو له نقض سره سره یې دغه کلپ ته د فعالیت اجازه ورکړې وه.
نوموړي په اېکس پاڼه کې لیکلي: «ما د دې پېښې په اړه د پلټنو امر کړی دی. دا پلټنې به د اورلګېدنې اصلي لامل او دا چې ایا د اور ضد خوندیتوب معیارونه او د ودانیو قوانین مراعات شوي او که نه، وڅېړي.»
ځینو هندي رسنیو ویلي، چې درې یا څلور سیلانیان هم د وژل شویو کسانو په ډله کې شامل دي. د راپورونو له مخې، درې کسان د سوځېدو له امله او نور د ساه بندۍ له کبله مړه شوي دي.
امریکا پاکستان ته د ناقانونه کډوالۍ او نشهیي توکو د مخنیوي په برخه کې د تخنیکي مرستو وړاندیز کړی دی. دغه څرګندونې د پاکستان د کورنیو چارو وزیر محسن نقوي او د امریکا د سرپرستې سفیرې نټلي بېکر ترمنځ د لیدنې پر مهال شوې دي.
په دغه ناسته کې د دواړو لوریو ترمنځ د نشهیي توکو پر ضد د ګډو اقداماتو، د ناقانونه کډوالۍ د مخنیوي لارو چارو او د استخباراتي معلوماتو د شریکولو د پراخېدو په اړه بحث او موافقه وشوه.
نقوي د امریکا وړاندیز ستایلی او ټینګار یې کړی، چې پاکستان د نشهيي توکو پر وړاندې د «صفر زغم» تګلارې په کلکه پلي کولو ته ژمن دی. د هغه په وینا، په هوايي ډګرونو کې د نشهيي توکو مخنیوی د حکومت لومړیتوب دی او په غېرقانوني کډوالۍ برخه کې د پاکستان تګلاره هم روښانه او ثابت دریځ لري.
دا په داسې حال کې ده، چې په پاکستان کې د افغان کډوالو نیولو او جبري ستنولو عملیات په وروستیو میاشتو کې خورا چټک شوي دي. د پاکستان د پلازمینې اسلام اباد او نورو ښارونو کې پولیس کور په کور د افغانانو د لټون عملیات کوي او په ډېرو سیمو کې د هغوی د کورونو دروازې ماتې شوي.
دې لړۍ د ډېرو افغانانو د ژوند شرایط سخت کړي او د بشري مرستو اړتیا یې زیاته کړې ده.
بلخوا په واشنګټن کې د یوه افغان له خوا د ملي ګارد پر سرتېرو له برید وروسته، د امریکا د ولسمشر د تازه فرمانونو په اساس دغه هېواد ته د افغان پناهغووښتونکو هر ډول د کډوالۍ قضیې ځنډول شوې دي.
د اروپايي ټولنې له خوا د غېرقانوني محتوا ضد قوانینو د سرغړونې له امله په اېکس شرکت باندې د ۱۴۰ میلیون ډالرو جریمې له لګولو وروسته، امریکایي میلیارډر اېلان ماسک د اروپايي ټولنې د منحل کېدو غوښتنه کړې ده.
ماسک ویلي، چې اروپايي ټولنه په یوه بیوروکراتیک جوړښت بدله شوې او واک باید بېرته خپلواکو هېوادونو ته وسپارل شي.
تر دې وړاندې اروپايي ټولنې د غېر قانوني او سختې محتوا د مخنیوي اړوند د نویو قوانینو د سرغړونې له امله اېکس شرکت ۱۴۰ میلیونه ډالره جریمه کړی و.
دا اقدام د اروپايي ټولنې د ډیجیټلي خدماتو قانون په چوکاټ کې لومړنی رسمي جریمه بلل کېږي.
اېلان ماسک د دې پرېکړې په غبرګون کې په اېکس پاڼه کې یو شمېر یادښتونه خپاره کړل او پکې یې د اروپايي ټولنې د منحل کېدو غوښتنه وکړه.
هغه په یوه یادښت کې لیکلي: «اروپايي ټولنه باید منحل شي او واک باید بېرته خپلواکو هېوادونو ته وسپارل شي، څو حکومتونه وکولای شي د خپلو خلکو ښه استازولي وکړي.»
اېلان ماسک همدارنګه خلک هڅولي، چې له اروپايي ټولنې ووځي تر څو خپل ملي حاکمیت بېرته ترلاسه کړي. دغه امریکايي میلیارډر د دې نظر د یو شمېر پلوي کوونکو لیکنې هم بېرته خپرې کړې دي.
بل لور ته د پولنډ لومړي وزیر ډونالډ ټوسک د هغو امریکايي کاروونکو د یادښتونو په غبرګون کې چې د اروپايي ټولنې په اړه لیکل شوي و، وویل: «اروپا ستاسو ستونزه نه ده، بلکې تر ټولو نږدې متحده مو ده. موږ ګډ دوښمنان لرو او باید همدا لاره تعقیب کړو. دا زموږ د ګډ امنیت لپاره یوازینۍ معقوله تګلاره ده.»
اروپايي کمېسیون د جمعې په ورځ اعلان وکړ، چې د اېلان ماسک اړوند پر اېکس شرکت د کړنو په اړه یې له دوه کلنې څېړنې وروسته ۱۴۰ میلیون ډالر جریمه لګولې ده.
د یادو پلټنو د پایلو له مخې، دغه ټولنیزې شبکې په څو برخو کې قانوني مقررات تر پښو لاندې کړي دي؛ چې پکې د حسابونو د تایید نښې ناسم ډیزاین، د اعلانونو په ارشیف کې د روڼتیا نشتوالی او څېړونکو ته د اړینو معلوماتو له سپارلو ډډه کول شامل دي.