د اسد د حکومت له نسکورېدو وروسته لا هم د ۱۵۰ زره تري تم شویو بندیانو برخلیک ناڅرګند دی
د سوریې د پخواني ولسمشر بشار الاسد د حکومت له نسکورېدو یو کال وروسته هم د هغه د واکمنۍ پرمهال د تري تم شویو لسګونو زرو بندیانو د کورنیو پلټنې بېځوابه پاتې دي.
د سوریې د پخواني ولسمشر بشار الاسد د حکومت له نسکورېدو یو کال وروسته هم د هغه د واکمنۍ پرمهال د تري تم شویو لسګونو زرو بندیانو د کورنیو پلټنې بېځوابه پاتې دي.
رویټرز د دوشنبې په ورځ د ډسمبر پر ۸مه راپور ورکړ، چې «د ورکو شویو کسانو ملي کمېسیون» چې د روان زېږدیز کال په مې میاشت کې جوړ شو، د اسد د رژیم پرمهال په جبري توګه د ورکو شویو قضیو په اړه شواهد راټولوي.د راپور له مخې، یاد کمېسیون تر اوسه پورې د سوریې په زندانونو کې د ورکو شویو شاوخوا ۱۵۰ زرو کسانو کورنیو ته هېڅ ډول معلومات نه دي ورکړي.د اسد د حکومت له سقوط سره په لومړي سر کې دا هیله راژوندۍ شوه، چې د زندان ریکارډونه کولی شي کورنیو ته روښانه کړي چې د دوی خپلوان کله او څنګه مړه شول.دوی هیله درلوده، چې د سوریې په ګوټ ګوټ کې د اسد د ځواکونو لهخوا کېندل شوي ډلهییز قبرونه به پرانېستل شي، ترڅو قربانیان په سمه توګه خښ شي، خو دا هیله لا تر اوسه نه ده پوره شوې.تېر کال کله چې د بشارالاسد وسلهوال مخالفین دمشق ته د تګ په لاره کې د سوریې له بېلابېلو ښارونو څخه تېر شول، دوی لومړی زندانونو ته لاړل او د زرګونو بندیانو د خوشې کولو لپاره یې دروازې پرانېستې.د ۲۰۲۴ کال د ډسمبر پر ۸ مه روسیې ته د اسد له تښتېدو څو ساعته وروسته، مخالفینو لسګونه کسان د سیدنایا زندان څخه خوشې کړل، هغه ځای چې د بخښنې نړۍوال سازمان د پراخو شکنجو او اعدامونو له امله «انساني قصاب خونه» بللې وه.د ورکو شویو کسانو ملي کمېسیون د سوریې د لنډمهاله ولسمشر احمد الشرع په امر تاسیس شو.د رویټرز په وینا، کمېسیون هیله لري چې د اېستل شویو جسدونو د پېژندلو لپاره د ډياېناې د لابراتوارونو په ګډون د نړۍوالو ادارو په همکارۍ خپل ځواکونه وروزي او تجهیزات ترلاسه کړي. د یادونې ده، چې دغه امکانات په سوریه کې په ډېره ټیټه کچه شتون لري.
