د طالبانو د عامې روغتیا وزارت د خوړو او درملو مرستیال حمدالله زاهد په هېواد کې د درملو د سترو تولیدي فابریکو له مسوولینو سره لیدنه کې وویل، پر وارداتو تکیه کول هېواد محتاج ساتي، خو پر کورنیو تولیداتو تکیه کول بیا اقتصادي خپلواکي رامنځته کوي.
طالبانو له څه باندې دوو میاشتو راهیسې د پاکستان له پوځ سره تر مخامخ نښتو او همداراز د پاکستان له لوري د ډیورند کرښې په اوږدو کې د دروازو له تړل کېدو وروسته له پاکستان سره هر ډول سوداګري او په ځانګړې توګه د کم کیفیت له امله پر پاکستاني درملو په بشپړ ډول بندیز ولګاوه.
په دې لړ کې د طالبانو د عامې روغتیا وزارت د خوړو او درملو مرستیال حمدالله زاهد د دوشنبې په ورځ (د لیندۍ ۱۷مه) د درملو د سترو تولیدي فابریکو له مسوولینو سره په کتنه کې وویل: «پر وارداتو تکیه کول مو تل محتاج ساتي،خو پر داخلي تولید تکیه مو اقتصادي خپلواکۍ ته رسوي.»
د نوموړي په وینا، له کورنیو تولیدي توکو استفاده کول په هېواد کې دننه د پانګې د راګرځېدو لامل کېږي او ورسره: «د کار زمینې برابرېږي او هم د کیفیت، مصونیت او مناسب قیمت تضمین کوي.»
حمدالله زاهد همداراز له یادو درمل جوړوونکو سره ژمنه وکړه، چې په نږدې راتلونکې کې به د هغو توکو واردات منع کړي، چې کورنۍ تولیدي فابریکې یې د بازار اړتیا پوره کولای شي.
په دې غونډه کې د څلورو درمل جوړوونکو کارخونو مسوولینو وویل، کارخونې یې په عصري ماشینرۍ او نوې ټکنالوژۍ سره سمبالې دي او دمګړی د اړتیا وړ ۲۱۷ډوله درمل تولیدوي.
د یادونې وړ ده، چې دا مهال په هېواد کې د درملو تولیدوونکو فابریکو شمېر ۱۱۰څخه ډېر شوی او له ۶۵۰ قلمو څخه زیات درمل تولیدوي.
دا په داسې حال کې ده، چې همدا څو ورځې مخکې سرچینو افغانستان انټرنشنل- پښتو ته وویل، له پاکستان سره د لارو د بندېدو له امله په افغانستان او په ځانګړې توګه کابل کې درمل کم شوي او بیې هم تر ۷۰ سلنې لوړې شوې او ناروغ لرونکي هم د درملو له کم کیفیت او د بیو له لوړېدو شکایت درلود.
