د ملګرو ملتونو سرمنشي انتونیو ګوترېش په لوېدیځ افریقایي هېواد بنین کې د کودتا په اړه اندېښنه ښودلې او ویلي یې دي، چې په دغه هېواد کې د اساسي قانون خلاف د واک نیولو لپاره د هرې هڅې په اړه ژوره اندېښنه لري.
ګوترېش نن دوشنبه (د لیندۍ ۱۷مه) پر خپلې اېکسپاڼې یو پیغام خپور کړی او لیکلي یې دي، چې په بنین کې د ډېموکراتیکې حکومتولۍ د کمزوري کولو هر ډول هڅې غندي. د هغه په وینا، دغه اقدام کولی شي د سیمې ثبات نور هم وګواښي.
هغه په پای کې ټینګار کړی، چې د قانون حاکمیت او اساسي قانون ته دې بشپړ درناوی وشي.
دا په داسې حال کې ده، چې د یکشنبې په سهار د بنین د عسکرو یوې ډلې حکومت منحل اعلان کړ او ویې ویل، چې په دغه هېواد کې د پاسکال ټایګر په مشرۍ یوې «پوځي کمیټې» واک نیولی، ملي اداره یې منحل کړې، اساسي قانون یې ځنډولی او ځمکنۍ، هوايي او سمندري پولې یې تړلې دي.
