د ایران ولسمشر مسعود پزشکيان قزاقستان او ترکمنستان ته سفر کوي
د ایران ولسمشر مسعود پزشکيان روانه اوونۍ قزاقستان او ترکمنستان ته سفر کوي. د ایران د ولسمشر سیاسي سلاکار ویلي، چې د پزشکيان سفر د دې هېوادونو د ولسمشرانو په رسمي بلنه ترسره کېږي.
د ایران ولسمشر مسعود پزشکيان روانه اوونۍ قزاقستان او ترکمنستان ته سفر کوي. د ایران د ولسمشر سیاسي سلاکار ویلي، چې د پزشکيان سفر د دې هېوادونو د ولسمشرانو په رسمي بلنه ترسره کېږي.
تمه ده، چې دواړه مشران به په دې لیدنه کې د ګڼو دوه اړخیزو موضوعاتو او سیمهییزو مسایلو په اړه خبرې وکړي.
د ایران د ولسمشر د سیاسي سلاکار په وینا، د دواړو هېوادونو ترمنځ له لسو څخه ډېر د همکارۍ اسناد به د کلتور، اقتصاد، قضا او ټرانزیټ په برخو کې د ولسمشرانو په حضور کې لاسلیک شي.
نوموړی زیاتوي، چې په استانه ښار کې به د ایران او قزاقستان د سوداګرو او کار جوړونکو ګډ کنفرانس هم جوړ شي. همداراز، د دواړو ملتونو د تاریخي اړیکو د درناوي په هدف به د فرهنګي اسنادو نندارتون او د ګډو فرهنګي او تاریخي ټکو په اړه د څو کتابونو مخکتنه ترسره شي.
ولسمشر پزشکيان به وروسته د ترکمنستان د ولسمشر په بلنه دغه هېواد ته سفر وکړي او د جمعې په ورځ به د «سولې او باور»په نړیوالې ناسته کې ګډون او وینا وکړي. د ایران د ولسمشر د سیاسي سلاکار په وینا، پزشکيان به د ترکمنستان له ولسمشر سره د انرژۍ، تجارت، ټرانزیټ او نورو دوه اړخیزو موضوعاتو په اړه خبرې وکړي. تمه ده، چې هغه به د نړۍوالې ناستې په څنډه کې د نورو ګډون کوونکو هېوادونو له مشرانو سره هم لیدهکاته ولري.
دغه ایراني چارواکی وایي، چې ایران د مرکزي اسیا هېوادونو سره د اړیکو پراختیا ته ځانګړی اهمیت لري او باور لري، چې د تاریخي، فرهنګي، تمدني او جغرافیایي نږدېوالي له امله د سیمهییزو همکاریو د پراخېدو لپاره مهم فرصتونه موجود دي.
