د افغانستان ملي جنبش ګوند مشر عبدالرشید دوستم وایي چې د طالبانو ضد درې مهمو سیاسي حرکتونو د «همغږۍ» نننۍ ناستې هغه ته یوه نوې هیله ورکړې او باور لري چې د افغانستان خلک، په ځانګړي ډول ښځې، به له روان ظلم او ستم څخه وژغورل شي.
عبدالرشید دوستم چې په دې غونډې کې یې په انلاین بڼه وینا کوله، وویل چې د ده هیله پیاوړې شوې او دا ناسته د ملي یووالي او همغږۍ د ګډو هڅو مهم ګام دی.
هغه زیاته کړه:«موږ اوس د کاروان په مخ کې یو او پر مخ ځو، نن دا د افغانستان د خلکو لپاره یو ستر بری دی».
ده د دریو سیاسي احزابو د همغږۍ غونډه د افغانستان د خلکو لپاره ستره لاسته راوړنه وبلله او ټینګار یې وکړ چې د هېواد د ژغورنې لپاره د سیاسي اجماع رامنځته کېدل یو مهم بدلون دی.
د طالبانو دریو سیاسي مخالفو ډلو؛ د افغانستان د ژغورنې مقاومت عالي شورا، د ژغورنې ملي مجمع او د سولې او عدالت ملي حرکت نن د سېشنبې په ورځ د خپلو چارو د همغږۍ په تړاو یوه ګډه اعلامیه خپره کړې ده.
په دې اعلامیه کې ټینګار شوی چې د افغانستان د کړکېچ حل باید د یوه همهشموله مذاکراتي بهیر له لارې مترقي شي؛ داسې بهیر چې ملګرو ملتونو، د سیمې هېوادونو او نړیوالې ټولنې ملاتړ پکې موجود وي.
دغه حرکتونه وایي چې د افغانستان اوسنی بحران یوازې د سیاسي تفاهم له لارې حل کېدای شي او د یوې عادلانه او دایمي سولې لپاره ګډ دریځ ته اړتیا ده.
د طالبانو مخالف سیاسي جریانونو دا ګډه غونډه په داسې وخت کې ترسره کوي چې د افغانستان سیاسي راتلونکی لا هم نامعلوم دی او نړیوالې هڅې د یوه سیاسي ټولشموله جوړښت د رامنځته کېدو پر محور راڅرخي.
