د ملګرو ملتونو د کډوالو عالي کمیشنرۍ د افغان راستنیدونکو ملاتړ لپاره له مایکرو فاینانس بانک سره د یو تړون لاسلیک کولو اعلان وکړ. یاد سازمان وایي چې د تړون له مخې راستنیدونکو کډوالو ته به د کوچنيو کاروبارونو د پیل کولو لپاره پورونه ورکړل شي.
د ملګرو ملتونو عالي کمیشنرۍ د یوې خبرپاڼې په خپرولو سره ویلي چې له دغه «نوښتګر تړون» وروسته د راستنېدونکو کډوالو لپاره د کوچنيو کاروبارونو پر پراختیا سربیره، د تخنیکي روزنې کورسونه هم جوړیږي.
د دغه سازمان په خبرپاڼه کې راغلي چې د تړون د پلي کولو په لومړي پړاو کې، ۳۳۰۰راستنېدونکو ته د سوداګرۍ د پیل لپاره پورونه ورکول کیږي.
د ملګرو ملتونو عالي کمیشنرۍ ویلي چې دا پروژه د اروپایي اتحادیې او په افغانستان کې د جاپان د نړیوالې همکارۍ ادارې په مالي ملاتړ پیل شوې.
مخکې له دې، د ملګرو ملتونو پراختیایي پروګرام د نومبر په ۲۳مه اعلان وکړ چې په افغانستان کې له ۱۰سلنې څخه کم کوچني کاروبارونه رسمي پورونو ته لاسرسی لري، چې له امله یې ښځینه متشبثینې له دې خدماتو محرومې پاتې دي.
یاد سازمان ویلي چې د ملګرو ملتونو د پراختیايي پروګرام په ټول افغانستان کې د ۷۵۰۰ کوچنیو سوداګریو لپاره شاوخوا ۲۰ملیون ډالره پورونه ورکړي دي، چې ۲۲۵۵د ښځو په مشرۍ سوداګرۍ هم پکې شاملې دي.
