د هرات ولایت په ګذره ولسوالۍ کې د طالبانو د امر بالمعروف، نهی عن المنکر او د شکایتونو د اوریدلو ریاست منسوبینو د یوې معتادې مور لهخوا د درې میاشتني ماشوم د پلورلو هڅه شنډه کړې ده.
د طالبانو د امر بالمعروف او نهی عن المنکر وزارت ویاند وايي، دوی هغه وخت خبر شول چې یادې مور غوښتل خپل درې میاشتنی ماشوم د شاوخوا ۶۰ زرو افغانیو په بدل کې وپلوري.
د نوموړي په وینا، د یاد ماشوم مور او پلار دواړه پر نشه یي توکو روږدي دي. مېرمنې د خپل میړه له اجازې پرته غوښتل چې ماشوم په بل کس وپلوري، خو هغه په دې اړه چې د یاد ماشوم برخلیک څنګه شو، څه نهدي ویلي.
