د خوړو نړۍوال پروګرام د افغانستان لپاره د اروپایي ټولنې له مرستې هرکلی وکړ

اسماعیل بقایي د پنجشنبې په ورځ (د لیندۍ ۲۰مه) د یوې اعلامیې په خپرولو سره زیاته کړه، چې ایران له خپلو ګاونډیو هېوادونو په ځانګړي ډول له پاکستان او افغانستان سره دوامداره اړیکې او سلا مشورې لري، څو په سیمه کې د سولې او ثبات د ټینګېدو لپاره ګډ کار وشي.

د هغه په وینا، دایران لپاره د سیمې امنیت ځانګړی ارزښت لري او همدې موخې ته په کتو، تهران د هر هغه اقدام ملاتړ کوي، چې د هېوادونو ترمنځ کړکېچ کم او تفاهم زیات شي.

د ایران د بهرنیو چارو وزارت د معلوماتو له‌مخې، دغه سیمه‌ییزه ناسته د هغو سلا مشورو پایله ده، چې په بېلابېلو کچو د سیمې له هېوادونو او مهمو لورو سره شوې دي.

اسماعیل بقايي څرګنده کړې: «دا ابتکار به د سیمه‌ییزې همکارۍ د پراختیا او د روانو ترینګلتیاوو د هوارېدو په برخه کې اغېزناک تمام شي.»

بقایي وایي، د افغانستان لپاره دا ناسته به د راتلونکې اونۍ په اوږدو کې په تهران کې د افغانستان لپاره د پاکستان، تاجکستان، ازبکستان، ترکمنستان، چین او روسیې د ځانګړو استازو په ګډون د ایران د بهرنیو چارو وزارت په کوربتوب ترسره شي.

دغه غونډه به په داسې حال کې جوړه شي، چې د افغان طالبانو او پاکستان تر منځ اړیکې ډېرې ترینګلې شوي دي.

له دې سربېره پرون په ملګرو ملتونو کې د ایران استازي وویل، تهران «په مستقیم او بېړني توګه» د افغانستان له تحولاتو اغېزمنېږي او څرګنده یې کړه، «د یوه ملي ټولګډوني حکومت له جوړېدو پرته به په افغانستان کې نښتې لاپسې تشدید شي.»

په هلمند کې د طالبانو د والي دفتر د پنجشنبې په ورځ (د لیندۍ ۲۰مه) ویلي، چې تر دې وروسته به د هبت‌الله اخوندزاده د امر پر بنسټ به په هرو دوو میاشتو کې یو ځل د سیمه ییزو نظامي او ملکي چارواکو تر منځ د همغږۍ غونډه جوړيږي.

د طالبانو د هلمند والي امان‌الدین منصور زیاته کړې، چې د غونډې د جوړېدو موخه د جنايي پېښو کمښت، د امنیتي چارو تنظیم، د هبت‌الله د فرمانونو تطبیق او اطاعت کول دي.

نوموړي له ټولو مسوولینو غوښتي: «یو موټی شۍ، وحدت، اطاعت او همغږي ته کار وکړۍ او د هیڅ ملامتوونکي له ملامتیا څخه ونه‌بېرېږۍ.»

په دې غونډه کې د هلمند ولایت لپاره د طالبانو د ښاري‌ محکمې مشر «د شرعي احکامو» پر تطبیق ټينګار کړی او زیاته یې کړه: «د شرایطو او اصولو د موجودیت په صورت کې شرعي احکام سل په سلو کې تطبیقېږي او هر مسوول، فرد او ولس ته بشپړ ډاډ ورکوو.»

د یادونې وړ ده، چې په دې وروستیو اونیو کې د هېواد د زونونو او ولایتونو په کچه د ښې حکومتولۍ او همداراز د همغږۍ په نوم غونډې ډېرې شوي او په ځینو دغه ډول غونډو کې له کابل څخه هم ځينې طالب چارواکي ګډون کوي.

لا تر اوسه په روښانه توګه نه‌ده مشخصه شوې، چې دا یوازې د همغږۍ غونډې دي او که هبت‌الله اخوندزاده غواړي د هېواد پر ټولو برخو خپل نفوذ پراخ او طالب مسوولین اطاعت کولو ته اړ کړي.

د طالبانو د کور او ښار جوړولو وزارت د پنجشنبې په ورځ (د لیندۍ ۲۰مه) ویلي، چې د منظور شوي پلان لرونکو ښارګوټو د نمرو د وېش بهیر اړمنو کډوالو کورنیو ته پيل شوی دی.

د دغه وزارت وزیر نجیب الله حقاني زیاته کړې، چې د هغو کډوالو کورنیو شمېر چې له ۵ څخه تر ۱۵ تنو وي له ۵ څخه تر ۱۵ بسوې ځمکه ورکول کیږي.

نوموړي ویلي، دغه ځمکې هغو کډوالو ته ورکول کیږي، چې د اسنادو پخلی یې اړوند ولایتي ادارو کړی وي.

د طالبانو د معلوماتو له‌مخې، چې د کډوالو لپاره جوړو شویو ښارګوټو کې د سړکونو، کوڅو، جوماتونو جوړول، د څښاک اوبو برابرول او نور د اړتیا وړ اسانتیاوې شامل دي.

طالبانو ډاډ ورکړی، چې پر اړمنو کډوالو د ځمکو د وېشنې بهیر همداراز دوام لری.

د یادونې وړ ده، چې په ډېرو سیمو کې ستانه شوي کډوال شکایت لري، چې د سرپناه په ګډون د ژوند لومړني اسانتیاوې ورته نه‌دي‌ برابرې شوي.

ستانه شوي افغانان د خوراک، پوښاک، کار، روغتیا، زده‌کړو او نورو برخو کې د امکاناتو د زیاتېدو غوښتنې لري.

المرصاد د پنجشنبې په ورځ (د لیندۍ ۲۰مه) د طالبانو د کډوالو او راستنېدنکو پر مخکیني وزیر خلیل‌الرحمان حقاني د ځانمرګي برید د طرحه کوونکي له نیولو خبر ورکړی دی.

نیول شوي کس په افغانستان کې د داعش ډلې لپاره چاودېدونکي توکي او ځانمرګي بریدګر تیارول.هغه خپل نوم میرحمزه او مستعار نوم اواب یادوي.

هغه زیاتوي، چې پنځه کاله وړاندې له داعش ډلې سره يو ځای شوی او واک ته د طالبانو له رسېدو را وروسته یې د کابل په اتمه ناحیه کې ژوند کاوه.

هغه زیاته کړې: «پنځه کاله مخکې له داعش سره یو ځای شوم.»

نوموړي زیاته کړې، چې پر خلیل‌الرحمان حقاني ځانمرګی بریدګر یې اماده کړی او له بلوچستان څخه د برید امر ورکړل شوی و.

هغه ویلي:«د بلوچستان له‌خوا د عثمان په نوم امر وکړ، چې د معلول په بڼه ځانمرګی بریدګر تیار کړي او بیا مو څو ځله د کډوالو او راستنېدونکو چارو وزارت ته ولېږه څو ښه بلد شي.»

حمزه اعتراف کړی، چې په کابل او ولایتونو کې یې د داعش لپاره بریدونه طرحه کول او چاودېدونکي توکي یې برابرول.

د داعش دغه نیول شوی کس زیاتوي، د چاودېدونکو توکو پر تیارولو بوخت و، چې د طالبانو د استخباراتو په عملیاتو کې ونیول شو.

خلیل الرحمان حقاني د حقاني شبکې د بنسټګر مولوي جلال‌الدین حقاني ورور او د طالبانو د کورنیو چارو وزیر سراج‌الدین حقاني تره و، چې د دې ډلې یو له مهمو کسانو و. د حقاني شبکې دا سپین ږیری غړی ډېری وخت په جرګو مرکو او د قومونو او قبایلو د همغږۍ پر چارو بوخت و.

خلیل‌الرحمان حقاني د تېر کال د ډسمبر په ۱۱مه د داعش د یوه ځانمرګي بریدګر له‌خوا د کډوالو چارو وزارت په دننه کې ووژل شو.

په دې مراسمو کې د هرات لپاره د طالبانو والي اسلام‌جار، د افغاني سرې میاشتې ټولنې رییس شهاب‌الدین دلاور او د ترکیې یو شمېر ډېپلوماټانو او استازو کډون درلود.

په دې مراسمو کې اسلام جار وویل، چې دا بشرپاله مرستې د بشري کړاوونو په راکمولو کې مهمې دي او همداراز یې زیاته کړه، چې د هرات او لوېدیځو ولایتونو خلک د ترکیې د دوامدارو همکاریو ستاینه کوي.

اسلام‌جار همداراز وویل، چې سیمه‌ییزه اداره د مرستو د عادلانه وېش په برخه کې هر ډول همکاریو ته چمتو ده او هڅه به وکړي چې مرستې په سمه او اغیزناکه توګه هغو کسانو ته ورسوي چې ورته اړتیا لري.

په هرات کې د ترکیې سرکونسل تزجان قاضي‌اوغلو څرګنده کړه، چې مرسته شویو محمولو کې خوراکي او غیر خوراکي توکي شامل دي او له دې مرستو څخه یې موخه د طبیعي پېښو له امله د اغیزمنو کورنیو لاسنیوی دی. هغه ټینګار وکړ چې ترکیه به د افغانستان له خلکو سره خپلو بشري همکاریو ته دوام ورکړي.

د طالبانو د افغاني سرې میاشتې ټولنې رییس شهاب‌الدین دلاور ژمنه وکړه، چې دغه مرستې به د هېواد مستحقو او زیانمنو کورنیو ته ورسول شي.