د ترکیې ولسمشر رجب طیب اردوغان په ترکمنستان کې د روسیې له ولسمشر ولادیمیر پوتین سره له لیدنې وروسته ویلي، هغه هیله لري چې د خپل امریکایي سیال ډونالډ ټرمپ سره د اوکراین د سولې پلان په اړه بحث وکړي. هغه له غونډې وروسته وویل چې د اوکراین د سولې تړون لرې نه دی.
د ترکیې ولسمشرۍ ماڼۍ د یوې خبرپاڼې په خپرولو سره ویلي چې اردوغان او پوتین د «جامعې سولې هڅې»او په اوکراین کې د جګړې د پای ته رسولو لارې چارې ارزولې دي.
ښاغلي اردوغان د ترکمنستان څخه د بیرته ستنیدو پر مهال په الوتکه کې خبریالانو ته وویل:«د پوتین سره له لیدنې وروسته، موږ هیله لرو چې د امریکا له ولسمشر سره هم د سولې پلان په اړه بحث وکړو، مونږ دا ګورو چې سوله لرې نه ده.»
د ترکیې ولسمشرۍ ماڼۍ لیکلي چې اردوغان پوتین ته وویل چې په جګړه کې محدود اوربند، په ځانګړې توګه د انرژۍ په تاسیساتو او بندرونو تمرکز، اغیزمن کېدلی شي.
په خبرپاڼه کې راغلي: «تور سمندر باید د جګړې ډګر ونه ګڼل شي. دا ډول وضعیت به یوازې روسیې او اوکراین ته زیان ورسوي. هرڅوک په تور سمندر کې خوندي تګ راتګ ته اړتیا لري. دا باید ډاډمن شي.»
