د افغانستان لپاره د پاکستان پخوانی ځانګړی استازی، اصف دراني وايي چې د تهران په سیمه ییزه غونډه کې د طالبانو نه ګډون د دغه ډلې سیاسي نابالغتیا ښیي. دا په داسې حال کې ده چې د طالبانو د بهرنیو چارو وزارت نن وویل چې د تهران په سیمه ییزه غونډه کې به ګډون ونه کړي.
ښاغلي دراني پر ایکس خواله رسنۍ لیکلي چې دا پریکړه دا دلیل روښانه او پیاوړی کوي چې طالبان نشي کولی په یوه مسله خبرې اترې وکړي.
هغه زیاته کړه چې طالبانو په ساده ډول د «نه منلو» چلند غوره کړی، کوم چې یو غیر فعال چلند دی او جدي ستونزې نه شي حل کولی.
د طالبانو د بهرنیو چارو وزارت نن اعلان وکړ چې دوی به د تهران په سیمه ییزه غونډه کې ګډون ونکړي.
یاد وزارت د خپل نه ګډون لپاره واضح دلیل نه دی ورکړی، مګر ویلي یې دي چې دوی د سیمه ییزو سازمانونو او دوه اړخیزو میکانیزمونو له لارې د سیمه ییزو هیوادونو سره فعالې اړیکې لري.
ټاکل شوې ده چې تهران په دې اونۍ کې د افغانستان په اړه د سیمه ییزې غونډې کوربه توب وکړي.
د ایران د بهرنیو چارو وزارت ویلي دي چې د افغانستان د چارو لپاره د پاکستان، تاجکستان، ازبکستان، ترکمنستان، چین او روسیې ځانګړي استازي به په دې غونډه کې ګډون وکړي.
