په هلمند کې د طالبانو د اطلاعاتو او کلتور ریاست شنبه د (لیندۍ ۲۲مه) خبر ورکړی چې په دې ولایت کې ۵۱کسان په ناقانونه ډول د توکو وارداتو په تور نیولي دي. وایي، دې کسانو ټول ټال ۴۹ټنه خوراکي توکي وارد کړي چې پهکې مالټې، لیمو او کبان هم شامل دي.
د طالبانو د اقتصاد وزارت خبر ورکړی، چې په کندوز کې د خصوصي سکټور لهخوا د ۴۲ میلیونه افغانیو په ارزښت د تازه مېوو او سبزیجاتو د ساتنې لپاره یوه سړه خونه جوړه شوې ده. طالبانو ویلي، چې دغه سړه خونه د زر متریک ټنه زراعتي محصولاتو، تازه مېوو او سبزیجاتو د ساتنې ظرفیت لري.
د طالبانو د اقتصاد وزارت د شنبې په ورځ (د لیندۍ ۲۲مه) ویلي، چې د کندوز ولایت د امام صاحب ولسوالۍ کې یې د تازه مېوو او سبزیجاتو د ساتنې لپاره دغه سړه خونه پرانېستلې ده.
د طالبانو په خبره، په دې سړه خونه کې درې مجهز معیاري تالارونه هم شته.
په کندوز کې د طالبانو مرستیال والي دا اقدام د بزګرانو د ملاتړ په موخه مهم ګڼلی او زیاته کړې یې ده: «د دې سړې خونې جوړول د اقتصاد په وده، د بزګرانو ملاتړ، د زراعتي محصولاتو د ضایع کېدو د مخنیوی او د دې سکټور د پیاوړتیا لپاره یو مثبت ګام دی.»
طالبانو له سوداګرو څخه د کورنیو تولیداتو په برخه کې د پانګونې غوښتنه کړې.
د طالبانو د کورنیو چارو وزارت ستر امنیتي مرستیال شمالي ولایتونو ته د سفر په ترڅ کې د شنبې په سهار سمنګان ته ورسېد او له ځايي طالب مسوولینو سره یې په کتنه کې وویل: د دوی نظام د ولس په همکارۍ رامنځته شوی او اوس باید د ولس د ستونزو د حل لپاره لازمې هڅې وشي.
ابراهیم صدر په یادو کتنو کې ویلي: «نننۍ نظام چې حاکم دی د ولسونو په همکارۍ لاسته راغلی، نو موږ او تاسو باید هڅې وکړو چې خپلې دروازې د ولس پر مخ خلاصې وساتو، د ولسونو ستونزې له نږدې واورو او د حل په موخه یې لازمې هڅې وکړو.»
د طالبانو د کورنیو چارو وزارت د شنبې په ورځ (د لیندۍ ۲۲مه) د یوې خبرپاڼې په خپرولو سره ویلي، ابراهیم صدر د ولایتي ادارو تر منځ پر همغږۍ ټینګار وکړ او له مسوولینو یې وغوښتل، د ولس د ستونزو د حل لپاره له علماوو او قومي مخورو سره مشورې وکړي.
د یادونې وړ ده، چې په دې وروستیو اوونیو کې د هېواد د زونونو او ولایتونو په کچه د ښې حکومتولۍ او همداراز د همغږۍ په نوم غونډې ډېرې شوي او په ځینو دغه ډول غونډو کې له کابل څخه هم ځينې طالب چارواکي ګډون کوي.
لا تر اوسه په روښانه توګه نهده مشخصه شوې، چې دا یوازې د همغږۍ غونډې دي او که هبتالله اخوندزاده غواړي د هېواد پر ټولو برخو خپل نفوذ پراخ او طالب مسوولین اطاعت کولو ته اړ کړي.
په کابل کې د اذربایجان سفير الهام محمدوف د طالبانو د اطلاعاتو او کلتور وزارت د ګرځندوی، مالي او اداري چارو له مرستیال قدرتالله جمال سره په کتنه کې وویل، هېواد یې له طالبانو سره د سیاسي، سوداګريزو، اقتصادي او کلتوري اړيکو پياوړتیا او پراختیا غواړي.
د طالبانو د اطلاعاتو او کلتور وزارت د شنبې په ورځ (د لیندۍ ۲۲مه) د یوې خبرپاڼې په خپرولو سره ویلي، په دې کتنه کې په کابل کې د اذربایجان سفیر زیاته کړه، اذربایجاني سیلانيان چې په رسنيو کې فعاله ونډه لري، له افغانستان څخه تر ليدنو وروسته يې د افغانستان بېلابېل کلتورونه، تفريحي او تاريخي ځايونه د رسنيو له لارې تر نړۍوالو ورسول او همداراز یې په ډاګه کړه، چې هېواد یې چمتو دی څو د انلاين کورسونو له لارې افغان ځوانان وروزي.
قدرتالله جمال په دې کتنه کې وویل:«هېوادونه د اړيکو د پياوړتیا پر بنسټ پرمختګ کوي، اذربایجان او افغانستان په ډېرو برخو کې ګډ مشترکات لري، له اذربایجان سره په اقتصادي، سیاحتي او کلتوري برخو کې د اړيکو پياوړتیا د دواړو هېوادونو په ګټه ده.»
نوموړي همداراز وویل، افغانستان له جګړو تازه راوتلی هېواد دی او په بېلابېلو برخو کې د دوست هېوادونو همکاريو ته اړتیا لري او په رسنيزه برخه کې به دواړه هېوادونه همغږي نوره هم پياوړې کړي، څو نړۍوالو ته د افغانستان د امن واقعي تصوير وړاندې شي.
د طالبانو د امر بالمعروف، نهی عن المنکر او شکایتونو اورېدلو وزیر خالد حنفي د ټولو ولایتونو د امربالمعروف له رییسانو سره په کتنه کې له هغوی څخه وغوښتل، چې له خلکو سره نرم او غوره چلند عمل وکړي او ستونزو ته پر وخت رسېدنه وکړي.
په داسې حال کې چې یو شمېر هېوادوال د امربالمعروف او نهې عن المنکر وزارت د محتسبینو له ناسم چلند څخه شکایت لري، خالد حنفي د ټولو ولایتونو د امربالمعروف له رييسانو سره د قانون د تطبیق، د معروفاتو اقامې، له منکراتو د مخنیوي، ټولنیزو ستونزو د حل، اسلامي ارزښتونو د پیاوړتیا او په اړوندو برخو کې د قوانینو د عملي کولو په موخه اصلاحي ناسته جوړه کړه.
حنفي په دې ناسته کې وویل: «له ولسي خلکو سره له نرم او غوره چلند څخه کار واخلئ او شته ستونزو ته یې پر وخت رسېدنه وکړئ.»
د نوموړي په وینا، د دوی د امر بالمعروف، نهی عنالمنکر او شکایتونو اورېدلو وزارت قانون یو جامع او حنفي فقهې په اساس جوړ شوی قانون دی او پلي کول یې د ټولو شرعي مسوولیت دی.
د یادونې وړ ده، چې یو شمېر هېوادوال په بېلابېلو ښارونو او عامه ځایونو کې د متحسبینو له ناسم او سپکاوي ډک چلند څخه شکایت لري.
د طالبانو د عامې روغتیا وزیر نور جلال جلالي د افغانستان لپاره د روغتیا نړۍوال سازمان له مشر سره په لیدنه کې د توبرکلوز او نري رنځ په برخو کې د امکاناتو او همکاریو پر زیاتېدو خبرې کړي. نوموړي ویلي، چې د نړۍوالو بنسټونو په ملاتړ هڅه کوي څو خلکو ته معیاري روغتیايي خدمتونه ورسوي.
د طالبانو د روغتیا وزارت د شنبې په ورځ (د لیندۍ ۲۲مه) ویلي، چې د دوی وزیر نور جلال جلالي د افغانستان لپاره د روغتیا نړۍوال سازمان له مشر ایډوین سینیزا سلاوډور سره په لیدنه کې د توربرکلوز برخې د خدماتو د پياوړتیا او روغتیايي مرکزونو ته د نري رنځ په برخه کې د اسانتیاوو د برابرولو په اړه بحث کړی.
طالبانو ویلي، ناروغانو ته د معیاري او پر وخت خدماتو وړاندې کول، د خدماتو د ښه کولو لپاره د بودیجې زیاتول، د روغتیايي کارکوونکو ظرفیت لوړول او د همکاریو زیاتېدل د ناستې نور موضوعات وو.
طالب وزیر ویلي: «د نري رنځ ناروغۍ مخنيوی او درملنه له لومړيتوبونو څخه ده او موږ هڅه کوو، چې د نړۍوالو همکارو بنسټونو په ملاتړ، د هېواد ټولو اوسېدونکو ته معياري روغتيايي خدمات ورسول شي.»
طالبانو ویلي، چې د روغتیا نړۍوال سازمان مسوولینو د همکاريو ډاډ ښودلی.
