د ملي دفاع وزارت پخوانی سرپرست شاهمحمود میاخېل وایي، ایران او پاکستان په تېرو څو لسیزو کې د افغانستان په تړاو مثبت رول نهدی لوبولی او تل یې هڅه کړې، چې د کمزوري افغانستان په موجودیت کې خپلې ګټې خوندي کړي.
نوموړي له افغانستان انټرنشنل ـ پښتو سره د یکشنبې په ورځ (د لیندۍ ۲۳مه) په خبرو کې ویلي، چې یاد هېوادونه هڅه کوي په افغانستان کې نفوذ ولري او د هغه په باور، هغه ناسته چې د افغانستان په تړاو په ایران کې ترسره شوې ده، د تېرو تجربو پر بنسټ هېڅ ګټه نهلري.میاخېل همداراز زیاتوي، چې د افغانستان د ثبات لپاره د ایران او پاکستان رول مهم دی، خو اړینه ده چې یوه داسې پروسه رامنځته شي، ترڅو د سیمې هېوادونه پکې رول ولري.د ملي دفاع وزارت پخوانی سرپرست شاهمحمود میاخېل وایي، چې اوسنیو شرایطو ته په کتو سره ایران غواړي خپل هېواد خوندي وساتي او خپلې ډلې پیاوړې کړي، ترڅو که بله ورځ په افغانستان کې حالات بدل شي، نو د هغوی له لارې وکولی شي خپل اهداف عملي کړي.میاخېل وایي، چې د ګاونډیو هېوادونو په ګډون د سیمې هېوادونه د افغانستان د وضعیت په اړه اندېښمن دي، ځکه د افغانستان حالت ښې لوري ته نه دی روان او ښایي وضعیت نور هم خراب شي.هغه وایي: «که د افغانستان وضعیت خراب شي، بېثباتي به رامنځته شي، جګړې به وشي او بېوزلي او اقتصادي ستونزې به زیاتې شي، چې دا به د سیمې پر هېوادونو هم اغېزې ولري.»د ملي دفاع وزارت پخوانی سرپرست شاهمحمود میاخېل زیاتوي، چې د سیمې د هېوادونو لویه ستونزه دا ده، چې تر اوسه یې په خپلو ستراتیژیکو پالیسیو کې بدلون نه دی راوستی او لا هم غواړي د افغانستان د خلکو پر ځای له خپلو ډلو سره اړیکې وساتي.نوموړي دغه څرګندونې تر هغه وروسته وکړې، چې ایران تېره ورځ د افغانستان په تړاو یوه سیمهییزه غونډه ترسره کړه، چې پکې د روسیې، پاکستان، چین، تاجکستان، ازبکستان او ترکمنستان ځانګړو استازو ګډون کړی و، خو طالبان په دې ناسته کې حاضر نه شول.ایران وایي، په افغانستان کې ثبات د ټولې سیمې لپاره یوه ستراتېژیکه او حتمي اړتیا ده. د دې هېواد د بهرنیو چارو وزیر عباس عراقچي په تهران کې د «افغانستان د ګاونډیو هېوادونو د ځانګړو استازو» په غونډه کې وویل، د افغانستان امنیت «په مستقیم ډول د ټولو ګاونډیو هېوادونو له ګټو سره تړلی دی.»
