د طالبانو د عامې روغتیا وزیر نور جلال جلالي هند ته د خپل سفر پر مهال د دې هیواد د چاپېریال، ځنګلونو او اقلیمي بدلون وزارت له وزیر کیرتي وردان سینګ سره لیدلي دي. هندي چارواکي په دې لیدنه کې د افغانستان د خلکو د روغتیایي امنیت د ملاتړ لپاره د هند ژمنه تازه کړی ده.
د طالبانو د عامې روغتیا وزارت ویاند نن جمعه، د لیندۍ ۲۷مه د یوې اعلامیې خپرولو سره ویلي، چې په دې لیدنه کې په بیلا بیلو اړینو موضوعاتو ، چې موخه یې د روغتیا په برخه کې همکاریو جلبول، ظرفیت لوړونه ، د درملو اوږدمهاله تأمین، او د روغتیا سکتور کې پراختیایي همکاریو پیاوړتیا وه خبرې تر سره شوې.
نور جلال جلالي د خپلو خبرو په ترڅ کې وویل ،هڅه یې د روغتیا په برخه کې د هر اړخیزو اړیکو پیاوړتیا او د افغان علمي کادرونو د ظرفیت لوړونې لپاره د زمینې برابرول دي ، نوموړي همدارنګه په بیلا بیلو برخو کې د تجاربو شریکول اړین وګڼل او په وینا یې دا چاره به د چاپیریال په پاک ساتنې او د ناروغیو په مخنیوي کې خورا اغیزمنه ثابته شي.
په همدې حال کې د هند د چاپېریال، ځنګلونو او اقلیم بدلون وزارت وزیر د هر اړخیزې همکارۍ ډاډ څرګند کړ او و یې ویل چې د افغانستان د خلکو د روغتیایي امنیت د ملاتړ لپاره د هند ژمنتیا یو ځل بیا تازه کوو او په بیلا بیلو برخو کې به له افغانستان سره همکاري روانه وساتي.
په ظاهر د طالبانو او پاکستان ترمنځ خرابې اړیکې ددې لامل شوي، چې د طالبانو او هند ترمنځ اړیکو کې پراختیا راغلې او دا دریم وزیر دی، چې هند ته سفر کوي.
