د امریکا د کالیفورنیا ایالت په اوکلېنډ ښار کې په یوې وسلهواله پېښه کې یو کس وژل شوی او یو بل ټپي دی. ځايي پولیسو د دغې پېښې د څرنګوالي په تړاو څېړنې پیل کړي، خو د وژل او ټپي شویو کسانو د هویت په اړه څه نهدي ویلي. ځايي افغانانو بیا ویلي، چې دغه متضررین افغانان دي.
د اوکلېنډ پولیسو د جمعې په ورځ (د لیندۍ ۲۸مه) ویلي، دغه پېښه نن سهار وختي رامنځته شوې او په لومړي سر کې دوه ټپي کسان یې موندلي چې په مرمیو لګېدلي و.
د پولیسو په وینا، له ټپیانو څخه یو یې روغتون ته له رسېدو مخکې مړ شو، خو بل ټپي لا هم په روغتون کې تر درملنې لاندې دی او روغیتايي وضعیت یې هم ښه ښودل شوی دی.
د اوکلېنډ د پولیسو د څېړنو څانګې په دې تړاو خپلې پلټنې پیل کړي او لا تر اوسه یې د وژل او ټپي شويو کسانو د هویت په تړاو څه نهدي ویلي.
ځايي افغانان بیا وايي، چې دغه متضررین افغانان دي، خو لا تر اوسه هم په کره توګه روښانه نهده او پولیس هم وایي، چې څېړنې دوام لري او د پېښې په تړاو به نور معلومات وروسته له رسنیو سره شریک کړي.
