په هرات کې د طالبانو ولایتي چارواکي وایي چې د ترکمنستان څخه د وارداتي برېښنا لین د رباط سنګي ولسوالۍ په بندر بغرچر سیمه کې د درنو واورو له امله پرې شوی دی. دوی زیاتوي، چې د برېښنا ریاست تخنیکي ټیم سیمې ته لیږل شوی ترڅو ستونزه حل او د برېښنا مزي وصل وکړي.
د ورکړل شویو معلوماتو له مخې، د ترکمنستان څخه هرات ته وارد شوې برېښنا د لیندۍ ۲۹مه شاوخوا ۲:۳۰ بجې د شپې پرې شوه.
په هرات کې د طالبانو د والي دفتر مخکې په یوه مطبوعاتي اعلامیه کې اعلان کړی و چې د واورې اورښت او د نامناسبې هوا د شرایطو له امله، د هرات - تورغونډۍ په لاره کې د لویو موټرو تګ راتګ، په ځانګړې توګه د بغرچر بندر په برخه کې، مناسب نه دی.
د افغانستان د برېښنا له اویا سلنې څخه زیاته برخه وارداتي ده او د اړتیا وړ برېښنا له تاجکستان، ازبکستان، ترکمنستان او ایران څخه واردیږي.
