د طالبانو ستره محکمه دیوې خبرپاڼې په خپرولو سره وایي چې په بامیانو ولایت کې یې د دوه ښځو په ګډون څلور کسان په دُرو وهلي دي. د یادې محکمې په وینا، دغه کسان د «لواطت، زنا او نامشروع اړیکو» په تور تورن وو.
د طالبانو سترې محکمې نن شنبه، د لیندۍ ۲۹مه د یوې اعلامیې په خپرولو سره ویلي، چې په بامیان ولایت کې یې دوو کسانو ته شپږ، شپږ میاشتې بند او له ۱۵تر ۳۵ دُرو سزا ورکړې ده. دوی زیاتوي چې دوو نورو کسان ته یې له یوه څخه تر دوو کالونو پورې بند او ۳۵ـ ۳۵ دُرو سزا ورکړې ده.
د یادونې وړ ده، چې طالبانو په تېرو درېیو میاشتو کې د افغانستان په ۱۹ ولایتونو کې د بېلابېلو تورونو په تړاو ۲۸۱ کسان په عام محضر کې په دُرو وهلي دي. د طالبانو د سترې محکمې د خبرپاڼو پر بنسټ، یاد کسان «د نشهیي توکو د کاروبار، زنا، لواطت، غلا، له کوره د تېښتې او اخلاقي فساد په تورونو مجازات شوي.»
